მესტიის მუნიციპალიტეტში დიდთოვლობამ „ლაჯანურის“ ელექტროგადამცემი ხაზი დააზიანა. "ენერგო-პრო ჯორჯიას“ თანამშრომლები უკვე მე-5 დღეა ცდილობენ დაზიანების კერას მიაღწიონ, თუმცა რთული მეტეოროლოგიური პირობების გამო, ეს ვერ ხერხდება. ამის შესახებ მესტიის მუნიციპალიტეტის მერი კაპიტონ ჟორჟოლიანი რადიო „ათინათს“ ესაუბრა.

მისივე განმარტებით, ამ ეტაპზე მუნიციპალიტეტს მხოლოდ "ჯვარის" ელექტროგადამცემი ხაზებიდან მიეწოდება ელექტროენერგია, რაც არ ჰყოფნის სრულ მომარაგებას.

„ელექტროენერგიის მოწოდება არ ხდება „ლაჯანურის“ ელექტროგადამცემი ხაზიდან, რომელიც დაზიანებულია უკვე მე-5 დღეა. მუნიციპალიტეტი მხოლოდ მარაგდება „ჯვარის“ ელექტროგადამცემი ხაზებიდან. სამწუხაროდ, ეს არ ჰყოფნის სრულ მომარაგებას, ამ ეტაპზე მხოლოდ შვიდი მეგავატი მოდის და ეს ვერ უზრუნველყოფს მუნიციპალიტეტის საჭიროებას. შესაბამისი სამსახურები ადგილზე სპეციალური ტექნიკით უკვე მუშაობენ, თუმცა, რთული კლიმატური პირობების გამო, ვერ ხერხდება დაზიანებული ხაზის შეკეთება.

დაზიანება ეხება უშგულის, კალას, იფარის, მულახის, ნაწილობრივ მესტიის მომარაგებას. მესტიის ნაწილში, დღის განმავლობაში, ითიშება შუქი, ქვედა სოფლებშიც გრაფიკით მიეწოდება და მხოლოდ ერთი საათით ირთვება“, - ამბობს მესტიის მერი.

ჟორჟოლიანის თქმით, სავარაუდოდ, ხვალ, 27 თებერვალს შესაბამისი სამსახურები დაასრულებენ ადგილზე მუშაობას და ელექტროენერგიის მიწოდება მუნიციპალიტეტის მასშტაბით სრულად აღდგება.