ოკუპირებული აფხაზეთის ე.წ. არჩეული პრეზიდენტი, ბადრა გუნბა საქართველოს შესახებ ამბობს, რომ „ადრე თუ გვიან, მეზობლებს მოუწევთ მიიღონ რეალობა, რომელშიც ვიმყოფებით“.

ამის შესახებ მან რუსულ სამთავრობო გამოცემა Tass-თან ინტერვიუში განაცხადა:

„ქართულ-აფხაზური ურთიერთობების მოწესრიგების საკითხები შეიძლება გადაწყდეს მხოლოდ საქართველოს მიერ ჩვენი ქვეყნის დამოუკიდებლობის აღიარების, ასევე ძალის გამოუყენებლობის ფუნდამენტური დოკუმენტების ხელმოწერის პირობებში. ჩვენ უნდა გვესმოდეს, რომ საქართველო ნამდვილად მზად არის ასეთი ნაბიჯების გადასადგმელად. ადრე თუ გვიან ჩვენს მეზობლებს მოუწევთ, გაიგონ და მიიღონ რეალობა, რომელშიც ვიმყოფებით“, – თქვა ბადრა გუნბამ.

1 მარტს ოკუპირებულ აფხაზეთში "საპრეზიდენტო" არჩევნების მეორე ტური გაიმართა. „პრეზიდენტობისთვის“ ორი კანდიდატი იბრძოდა, ბადრა გუნბა, რომელსაც მოსკოვი ღიად უჭერდა მხარს და აფხაზი ოპოზიციონერი, ადგურ არძინბა. დე ფაქტო ცესკოს მონაცემებით, გაიმარჯვა ბადრა გუნბამ, მან ხმების 54,73%, ხოლო ადგურ არძინბამ - 41,54% .

5 მარტს ის რუსეთის პრეზიდენტ ვლადიმირ პუტინს შეხვდა. პუტინმა გუნბას არჩევნებში გამარჯვება მიულოცა და მის შედეგს „კარგი“ უწოდა და „ორმაგი მოქალაქეობის“, ელექტრომომარაგების და სხვა საკითხების მოგვარებას დაჰპირდა.

„ჩვენ აღიარებული ვართ რუსეთის ფედერაციის მიერ, რისთვისაც მადლობლები ვართ ვლადიმირ ვლადიმიროვიჩ პუტინის, დმიტრი ანატოლიევიჩ მედვედევისა და, რასაკვირველია, რუსი ხალხის, ვინც ამ გადაწყვეტილებას მხარი დაუჭირა. ჩვენ ყოველთვის თბილი ურთიერთობები გვქონდა რუსეთის სახელმწიფოსთან, რუს ხალხთან, ჩვენ ისტორიული, კულტურული კავშირები გვაკავშირებს, და ჩვენთვის მნიშვნელოვანია მსგავსი მჭიდრო ურთიერთქმედების შენარჩუნება და ჩვენი სახელმწიფოებრიობის შემდგომი აღიარების საკითხი ასევე შეიძლება გადაწყდეს რუსეთის ფედერაციასთან თანამშრომლობის ფარგლებში, რადგან სწორედ რუსეთი გვიწევს მხარდაჭერას აფხაზეთის აღიარების გაფართოების საკითხებში, რისთვისაც ძალიან მადლობელი ვართ“, - განაცხადა გუნბამ.

ის რუსეთთან საინვესტიციო შეთანხმების პერსპექტივის საკითხსაც შეეხო. შესაბამის კითხვაზე პასუხისას, მან თქვა, რომ ხელშეკრულება „არსებული სახით“ არ მიიღება.

„თუ საზოგადოება ამბობს, რომ ჩვენ ასეთი შეთანხმება არ გვჭირდება, ჩემთვის, როგორც პასუხისმგებელი პირისთვის, აუცილებელია ყური ვუგდო ჩვენი ხალხის აზრს. ჩემს რუს კოლეგებთან გამოვედი ინიციატივით, არ მივიღოთ ასეთი სახის გადაწყვეტილება ამ ფორმით და ჩვენი რუსი კოლეგები გაგებით მოეკიდნენ ამ საკითხს და საინვესტიციო შეთანხმება ამ სახით, დანამდვილებით, აღარ იქნება“, - თქვა აფხაზმა პოლიტიკოსმა.

ვადამდელი „საპრეზიდეტო“ არჩევნები ოკუპირებულ აფხაზეთში მას შემდეგ დაინიშნა, რაც ყოფილი “პრეზიდენტი” ასლან ბჟანია თანამდებობიდან 2024 წლის 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. პასუხად, მაშინ მოსკოვმა სოხუმს სრულად შეუჩერა დაფინანსება და უფასო ელექსტროენერგიის მიწოდება შეუწყვიტა.