სოფელ იაშტუხასთან, სოხუმის მახლობლად, ცეცხლის კერებს აქრობენ.  ინფორმაციას სააგენტო „აიაშარა“ ავრცელებს, სოხუმის „სახანძროს“ უფროსზე, თემურ კვიცინიაზე დაყრდნობით.

მისივე ცნობით, ცეცხლი დასახლებულ პუნქტს მოუახლოვდა, თუმცა, სიტუაციას აკონტროლებენ. ცეცხლის ქრობაში სამი სახანძრო მანქანა და  20 მაშველია ჩართული.  

აფხაზეთის დე ფაქტო რესპუბლიკის საგანგებო სიტუაციების სამინისტრო აცხადებს, რომ ბოლო დღეებში მკვეთრად გაუარესდა მდგომარეობა ბუნებრივ ხანძრებთან დაკავშირებით.

„აფხაზეთის ყველა რაიონში ტყის ქვედა საფარი და ეკალბარდი იწვის საგანგებო სიტუაციების სამინისტროს ქვედანაყოფები გაძლიერებულ რეჟიმში მუშაობენ. ხანძრის გამომწვევი მთავარი მიზეზი ადამიანური ფაქტორია“, - ნათქვამია ინფორმაციაში.

„საგანგებო“ მოუწოდებს მოქალაქეებს, დაიცვან სახანძრო უსაფრთხოების ზომები და არ დაწვან სასოფლო-სამეურნეო ნარჩენები.