120 დღეზე მეტია, რაც ზუგდიდში უწყვეტი პროტესტი გრძელდება. ისევე, როგორ წინა თვეებში, მოქალაქეები დღესაც, 19 საათიდან შეიკრიბნენ სახელმწიფო რწმუნებულის ადმინისტრაციის შენობასთან.
მათ ადგილზე მიიტანეს, საქართველოს , ევროკავშირის, აშშ-ს და უკრაინის დროშები და საპროტესტო შინაარსის ბანერები.

სხვადასხვა თაობის ადამიანების, სამოქალაქო საზოგადოების წარმომადგენლების, აქტივისტების, ოპოზიციური პარტიების წარმომადგენლების მოთხოვნები, უცვლელია, ხელახალი სამართლიანი არჩევნების ჩატარება და აქციებისას დაკავებული დემონსტრანტების გათავისუფლება.

დღეს განსხვავებული ფორმატით წარიმართა შეკრება, მას 20 საათიდან შეუერთდა ისტორიკოსი ირაკლი ხვადაგიანი საჯარო ლექცია/დისკუსიით თემაზე: „რეპრესიების მექანიზმები: რუსული ოკუპაციის გამოცდილება და თანამედროვე პარალელები“.


მან ისაუბრა  რუსული ტოტალიტარული საოკუპაციო რეჟიმის 1920-იანი წლების პოლიტიკური რეპრესიების კამპანიებზე, საქართველოს დამოუკიდებლობისა და დემოკრატიისათვის პოლიტიკური ბრძოლისა და წინააღმდეგობის გამოცდილებაზე.

მას შემდეგ, რაც 28 ნოემბერს, „ქართულმა ოცნებამ“ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, თბილისსა დასაქართველოს სხვადასხვა ქალაქში პერმანენტული პროევროპული საპროტესტო აქციები იმართება.