2025-2026 სასწავლო წლისთვის საჯარო სკოლებში პირველკლასელთა რეგისტრაციის პირველი ეტაპი, რომელიც სპეციალური საგანმანათლებლო საჭიროების მქონე ბავშვებისთვის სასურველ სკოლაში განაცხადის წარდგენას გულისხმობდა, დასრულებულია. ამის შესახებ რადიო „ათინათს“ ადგილობრივი რესურსცენტრის ხელმძღვანელმა მამუკა ბულიამ უთხრა.

მისივე თქმით, ამჟამად 1-ელ ეტაპზე რეგისტრირებული ბავშვებისთვის დოკუმენტების წარდგენის პროცესი მიმდინარეობს და 30 აპრილის ჩათვლით გაგრძელდება, ხოლო ვინც დარეგისტრირება ვერ მოასწრო, მას შეუძლია 2025 წლის 22 მაისიდან 17 ივლისის ჩათვლით საყოველთაო ონლაინ რეგისტრაციაში მონაწილეობა.

მე-2 ეტაპი, 2 მაისიდან 20 მაისის ჩათვლით, არის რეგისტრაცია ბავშვებისთვის, რომელთა და-ძმაც სწავლობს სასურველ სკოლაში, ან მშობელია ამავე სკოლის თანამშრომელი, ასვე, თუ ოჯახიდანაც ერთდროულად ორი ან მეტი ბავშვი შედის იმავე სკოლის პირველ კლასში.

მე-3 ეტაპი, 22 მაისიდან 17 ივნისის ჩათვლით, საყოველთაო რეგისტრაციაა, რომელიც განათლების მართვის საინფორმაციო სისტემის ოფიციალურ ვებგვერდზე registration.emis.ge - ზე იქნება შესაძლებელი, მშობლის ან კანონიერი წარმომადგენლის მეშვეობით.

მე-4 ეტაპი, 30 ივნისიდან 15 ივლისის ჩათვლით, გულისხმობს დარჩენილ თავისუფალ, ასევე, წინა ეტაპებზე გამოთავისუფლებულ ადგილებზე იმ მოსწავლეების რეგისტრაციას, რომლებიც I, II და III ეტაპებზე ვერ დარეგისტრირდნენ ან სურთ რეგისტრაციის შეცვლა.

ბულიას თქმით, დეტალური ინფორმაცია მშობელს ან დაინტერესებულ პირს შეუძლია საქართველოს განათლების, მეცნიერებისა და ახალგაზრდობის სამინისტროს ვებ გვერდზე ნახოს.