ახალი ამბები
ზუგდიდში იმ ცენტრის გადატანას ითხოვენ, რომლითაც მეთადონის პროგრამის ბენეფიციარები სარგებლობენ
"ყველაფერი იწყება დილის 5 საათიდან. მოდიან მეტადონის პროგრამის ბენეფიციარები, არის ხმამაღალი საუბარი, ბილწსიტყვაობა, ჩხუბი, ცხვირ-პირის მტვრევა, ყვირილი ბოლო ხმაზე, ყველგან მიმოფანტული ინსულინის ნემსები და ერთჯერადი ჭიქები - წლებია, ჯოჯოხეთში ვცხოვრობთ", - ასე აღწერს ზუგდიდში გამარჯვების ქუჩის მაცხოვრებელი მისი და მეზობლების ყოველდღიურობას. ეს სწორედ ის ადგილია, სადაც ფსიქიკური ჯანმრთელობისა და ნარკომანიის ცენტრის განყოფილება მდებარეობს. ადგილობრივები ობიექტის ქალაქის ცენტრიდან  სხვა ლოკაციაზე გადატანას მოითხოვენ.

ამის მიზეზად მოსახლეობა აღნიშნულ ცენტრში მეთადონის ჩანაცვლებითი თერაპიით მოსარგებლეთა ქცევას და უსაფრთხოების ზომების დარღვევას ასახელებს. ქუჩის მცხოვრებლები პრობლემაზე, წლებია, საუბრობენ, თუმცა, როგორც თვითონვე ამბობენ, უშედეგოდ. მოქალაქეებმა რამდენიმე დღის წინ შესაბამისი წერილით ადგილობრივ ხელისუფლებასაც მიმართეს.

"გამთენიისას იწყება და დღის 2 საათამდე მაინც ასეა. შეწუხებულია კერძო სახლებში მცხოვრები მოსახლეობაც და მით უფრო კორპუსში მცხოვრები ადამიანები. იქიდან გამოსულებიც არსად მიდიან, აქვე სვამენ ყავას. სადარბაზოები, თხრილი, ყველაფერი ამოვსებულია ინსულინის შპრიცებით, ყავის ჭიქებით. არ დაგვიტოვებია არცერთი ინსტანცია: მერია, გუბერნია, საკრებულო...ზუგდიდში ადგილი ვერ იშოვეს, სადაც 2 ოთახს გამოუყოფენ? დააყენონ ტრანსპორტი და მიიყვანონ. ბავშვებს ქუჩაში ვერ უშვებენ. გასაგებია მათი უფლებები, მაგრამ ჩვენც ხომ ვარსებობთ?", - გვეუბნება ცენტრის სიახლოვეს მცხოვრები პირი, რომლის ვინაობასაც შეგნებულად არ ვწერთ.

კიდევ ერთი ადგილობრივი გვიყვება, რომ ნარკოდამოკიდებული პირები ხშირად სარგებლობენ ცენტრის მიმდებარე სადარბაზოებითა და ეზოებით, რის გამოც ბავშვები სახლიდან გასვლას ერიდებიან. მოქალაქე გვიყვება, რომ ამ ეტაპზე რამდენიმე ათეული ხელმოწერა შეგროვდა და ხელისუფლებისგან კონკრეტული ნაბიჯების გადადგმას ელოდებიან.

"ძალიან ბევრჯერ მივმართეთ, დაპირებები დაპირებად რჩება. მთელმა სამეზობლომ ათი დღის წინ განცხადებას მოვაწერეთ ხელი. ხომ შეიძლება ეს გადაიტანონ სადმე ქალაქგარეთ. გვეშინია, აგრესიულები არიან და ვერაფერსაც ვერ ვეუბნებით", - გვეუბნება რესპონდენტი.

ფსიქიკური ჯანრთელობის და ნარკომანიის ცენტრის ზუგდიდის განყოფილების თანამშრომელი, ექიმი ფსიქიატრ-ნარკოლოგი ნატალია აბულაძე მიიჩნევს, რომ იმ შემთხვევაში, თუ კი არ იქნება აღკვეთილი ნებისმიერი კანონდარღვევა, რომელზეც ადგილობრივები საუბრობენ, ლოკაციის შეცვლა ქმედით შედეგს ვერ გამოიღებს. ის შესაბამისი ინფრასტრუქტურის გამართვის საჭიროებაზე საუბრობს და ხაზს უსვამს, რომ საკითხის მიმართ კომპლექსური მიდგომაა საჭირო. სხვა შემთხვევაში, მისი აზრით, მსგავსი მიდგომა სტიგმატიზაციას შეუწყობს ხელს.

"თუ არ აღკვეთს პოლიცია კანონდარღვევას, რაც ხდება ქუჩაში, მიმდებარე ტერიტორიაზე, არ აქვს მნიშვნელობა, სად იქნება ეს ცენტრი. ის ინფრასტრუქტურა და ფართი, რაც საჭიროა, რა თქმა, უნდა არ აქვს ამ განყოფილებას. ჩვენ უმძიმეს მდგომარეობაში რომ ვმუშაობთ, არავის აინტერესებს. ყველა დამრღვევს, არის თუ არა პროგრამის მონაწილე, კანონის მიხედვით უნდა მოეპყროს შესაბამისი ორგანოები და მერე ყველა თავის თავს გაუფრთხილდება. ვიწრო კორიდორში რიგი რომ არის, იქაც ხდება ინციდენტები. ბავშვები ყველგან ცხოვრობენ, ამათი სტიგმატიზაცია და გარიყვა კი არა, რესოციალიზაციაა საჭირო, მაგრამ როცა ქუჩაში არღვევს წესრიგს, ამაზე პოლიციამ უნდა იზრუნოს. ტყეში ვერ გადაიტან პროგრამას და ვერ გადაიყვანენ ამ ადამიანებს. წესრიგის დამრღვევია 1000-დან 50 ბენეფიციარი, მაგრამ სხვები? მათზე ვინ ფიქრობს? აქ პაციენტები დადიან ჩხოროწყუდან, წალენჯიხიდან, სვანეთიდან, აფხაზეთიდან, მათ შორის ეთნიკურად აფხაზი პაციენტები. თვეში დაახლოებით 1 000 ადამიანი მოდის ჩვენთან", - ამბობს სპეციალისტი.

მეტადონის პროგრამის ქალაქიდან გარეუბანში გადატანის საკითხი რომ აქტიური განხილვის პროცესშია, ამას ზუგდიდის მერიაშიც ადასტურებენ და ამბობენ, რომ გადაწყვეტილებას მიღებისთანავე შეგვატყობინებენ.

რაც შეეხება ზუგდიდის საკრებულოს, მისმა თავმჯდომარემ მოქალაქეთა მხრიდან შემოსული კოლექტიური წერილის საპასუხოდ ჯანდაცვის სამინისტროს უკვე მიმართა.

"თხოვნა იყო, რომ იმ ლოკაციიდან გადატანილიყო აღნიშნული პროგრამით მომსახურება. ბუნებრივია, ჩვენც მივმართეთ ჯანდაცვის სამინისტროს წერილით, შუამდგომლობით, რომ გაითვალისწინონ მოსახლეობის ეს თხოვნა და ჩვენი პოზიციაც იყო, რომ ეს კონკრეტული ლოკაცია იყოს ქალაქგარეთ გატანილი და აღარ იყოს ქალაქის ცენტრში", - გვითხრა გიგა ფარულავამ.

მისი ინფორმაციით, ჯანდაცვის უწყებას წერილი, დაახლოებით, 1 კვირის წინ გაუგზავნეს.

აღნიშნულ საკითხთან დაკავშირებით რადიო "ათინათი" დაუკავშირდა დევნილთა, შრომის, ჯანმრთელობისა და სოციალური დაცვის სამინისტროს  და უწყების კომენტარს მიღებისთანავე შემოგთავაზებთ.

ფსიქიკური ჯანმრთელობის და ნარკომანიის პრევენციის ცენტრი 2012 წლიდან ფუნქციონირებს. ცენტრი "ნარკომანიისა" და "ფსიქიატრიის" სახელმწიფო პროგრამების განმახორციელებელი დაწესებულებაა. ცენტრში ფუნქციონირებს მეთადონითა და სუბოქსონით ჩანაცვლებითი თერაპიის პროგრამები, რომლის ფარგლებშიც, 5000-ზე მეტი ბენეფიციარი იღებს შესაბამის მკურნალობას, ცენტრის ყველა ფილიალის მასშტაბით.
Print Email
FaceBook Twitter
რ ე კ ლ ა მ ა
ზუგდიდის მუნიციპალიტეტის მერის მოადგილე ბესიკ ჭეჟია, სამეგრელო-ზემო სვანეთის სახელმწიფო რწმუნებულის მოადგილე ლუდუკ ხასიასთან და მაჟორიტარ დეპუტატებთან ერთად, ალერტკარის, ჭკადუაშის, ჭაქვინჯისა და ხეცერას ადმინისტრაციულ ერთეულებში მიმდინარე ინფრასტრუქტურულ სამუშაოებს გაეცნო.
ზუგდიდის მუნიციპალიტეტის ცაცხვის ადმინისტრაციულ ერთეულში მდებარე კოლხურ სამაროვანზე (ე. წ. ,,ცაიშის სამაროვანი“) ზუგდიდის მუნიციპალიტეტის მერიის დაფინანსებით საველე არქეოლოგიური კვლევა-ძიება მიმდინარეობს (ექსპედიციის ხელმძღვანელი, ისტორიის დოქტორი რ. პაპუაშვილი).
ანაკლიასა და განმხურუში ტურისტული სეზონი აქტიურ ფაზაშია.
კორონავირუსი
ბოლო სტატისტიკის თანახმად, 7 აგვისტოდან 14 აგვისტოს ჩათვლით საქართველოში კორონავირუსი 12 338 ადამიანს დაუდასტურდა, მათგან 1 094 სამეგრელო-ზემო სვანეთში მცხოვრებია. გარდაიცვალა ვირუსით ინფიცირებული 6 პაციენტი.
დე ფაქტო აფხაზეთის ჯანდაცვის სამინისტროს პრესსამსახურის ინფორმაციით, ბოლო ორი დღის განმავლობაში კორონავირუსით ორი ადამიანი 87 და 37 წლის მამაკაცი გარდაიცვალა.
1-ელიდან 8 აგვისტოს ჩათვლით აფხაზეთის დე პარტო რესპუბლიკაში კორონავირუსით ინფიცირების 312 შემთხვევა დადასტურდა.
საზოგადოება
შინაგან საქმეთა სამინისტრომ საგზაო მოძრაობის უსაფრთხოების ხარისხის გაუმჯობესების მიზნით კანონპროექტები შეიმუშავა, რომლის თანახმადაც, მძღოლებისთვის გზაზე მოძრაობის წესები მკაცრდება.
საქართველოს მთავრობის დადგენილებით პირველი აგვისტოდან ქორწინების რიტუალის საზეიმო ვითარებაში ჩატარება იუსტიციის სახლის ფილიალში ან საზოგადოებრივ ცენტრში 75 ლარი ეღირება.
ზუგდიდში გამომცემლობა "ინტელექტის" ორგანიზებით 16 და 17 ივლისს წიგნების პრეზენტაცია გაიმართება. სტუმრებს საშუალება ექნებათ ავტორებს - მარი მალაზონიასა და ნესტან ნენე კვინიკაძეს შეხვდნენ და მათ კითხვები დაუსვან.
ამავე კატეგორიაში
დღის სიახლეები
19 / აგვისტო 2022
აზიური ფაროსანა, სოკოვანი დაავადებები, უამინდობა - ეს ის ბუნებრივი მოცემულობაა, რომელთანაც გამკლავება მეთხილე ფერმერებს უწევთ.
19 / აგვისტო 2022
გამოძიება იმავე ეტაპზეა, ძებნაზეა დასმული და ისევ ვეძებთ. მეტი ახალი არაფერი არ გვაქვს, სამწუხაროდ, - ასე უპასუხა შს მინისტრმა ვახტანგ გომელაურმა ჟურნალისტების კითხვას "საქართველოს ბანკზე" თავდასხმაში ბრალდებული ბადრი ესებუას შესახებ.
19 / აგვისტო 2022
ყოფილი პრემიერ-მინისტრის გიორგი გახარიას პარტია "საქართველოსთვის" სენაკის რაიონული სასამართლოს გადაწყვეტილებას, რომლის თანახმადაც, მუნიციპალიტეტის საკრებულოს თავმჯდომარე აღარ ჰყავს, გაასაჩივრებს.
დილის ჩართვა
მთავარი საინფორმაციო გამოშვება
არქივი
ამინდი
ზუგდიდი 26 °C
img
სოხუმი 26 °C
img
ფოთი 27 °C
img
მესტია 16 °C
img
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.