საქართველოს მწერალთა სახლის ხელმძღვანელად „ქართული ოცნების“ დეპუტატის ქეთევან დუმბაძის დანიშნვას ეწინააღმდეგება 102 ქართველი მწერალი, მთარგმნელი, გამომცემელი და ლიტერატურულ სფეროში დასაქმებული ადამიანი. მათ შორის არიან ზუგდიდელი ავტორები ზვიად კვარაცხელია, ნიკა ლაშხია და გიორგი შონია.

მწერალთა სახლის მიერ 12 აგვისტოს გამოქვეყნებულ განცხადებაში გამოკვეთილია ყველა ის მიზეზი, რის გამოც ახალ დირექტორს ბოიკოტი გამოუცხადეს ქართველმა ავტორებმა.

„როდესაც კულტურის მინისტრს არ შეუძლია ელაპარაკოს ლიტერატურის სფეროს წარმომადგენლებს, არ აქვს სურვილი მივიდეს მწერალთა სახლში, დააფასოს და აღიაროს მისი თანამშრომლების მიერ ათი წლის განმავლობაში გაწეული უზარმაზარი შრომა, ის კარგავს ლეგიტიმაციას.

მინისტრის მიერ მიღებული გადაწყვეტილება, პარტიული კუთვნილების ნიშნით შეარჩიოს და ერთპიროვნულად დახურულ კარს მიღმა დანიშნოს ისეთი ინსტიტუციის ხელმძღვანელი, როგორიცაა მწერალთა სახლი, კატეგორიულად მიუღებელია. ის წარმოადგენს საბჭოთა ტოტალიტარული ტრადიციის ამაზრზენ გამოხატულებას და დამაზიანებელია ქართული კულტურისთვის სასიცოცხლოდ მნიშვნელოვანი საერთაშორისო ურთიერთობებისთვის“ - ვკითხულობთ განცხადებაში.

აქვე ხაზგასმულია, რომ ხელმომწერები დაუმორჩილებლობას უცხადებენ კულტურის სამინისტროს იმ პოლიტიკას, რომელიც ატარებს არადემოკრატიულ, ანტისახელმწიფოებრივ ხასიათს და არ იღებენ ახალ დირექტორად იმას, ვინც ქართული საზოგადოების საწინააღმდეგოდ საკანონმდებლო ორგანოში მხარი დაუჭირა ე.წ რუსულ კანონს.

რადიო „ათინათი“ დაუკავშირდა განცხადების ზუგდიდელ ხელმომწერებს, ზვიად კვარაცხელიასა და ნიკა ლაშხიას.

კვარაცხელიას თქმით, აღნიშნული გადაწყვეტილება წარმოადგენს იმ რეპრესიული პოლიტიკის გაგრძელებას, რომელსაც მინისტრი წულუკიანი ახორციელებს კულტურისა და მეცნიერების სფეროში დასაქმებულ პროფესიონალთა წინააღმდეგ.

„გადაწყვეტილება მიმართულია იმ ორგანიზაციების წინააღმდეგ, რომლებიც არიან თავისუფლების კუნძულები საქართველოში, რომლებიც არ ემორჩილებოდნენ და არ ემორჩილებიან ქართული ოცნების პარტიულ დიქტატს. ეს არის ერთგვარი შურისძიება პროფესიონალების წინააღმდეგ მათი თავისუფალი აზრის წინააღმდეგ, რაც დაგვირგვინდა რუსულ კანონზე ხელმომწერი დეპუტატის მწერალთა სახლში მივლინებით“, - ამბობს კვარაცხელია.

კვარაცხელიამ აღნიშნა, რომ მწერლები მოითხოვდნენ დირექტორის კანტიდატის სამუშაო ჯგუფთან და სექტორის პროფესიონალებთან ერთად შერჩევას, თუმცა დირექტორი ჩვეულ სტილში, პარტიული და ერთპიროვნული გადაწყვეტილებით დაინიშნა.

მსგავსად სხვა ხელმომწერებისა, ნიკა ლახშიაც ყურადღებას ამახვილებს ერთპიროვნული დანიშნვის პრობლემაზე.

„მწერალთა სახლის ხელმძღვანელი არავითარ შემთხვევაში არ უნდა დაინიშნოს კულტურის მინისტრის ხელდასხმით. მიმაჩნია, რომ არჩევნების გზით მწერლებმა უნდა აირჩიონ, თუ ვინ უხელმძღვანელებს მწერალთა სახლს“, - თქვა ლაშხიამ.

საქართველოს კულტურის, სპორტისა და ახალგაზრდობის მინისტრის, თეა წულუკიანის მიერ ხელმოწერილი ბრძანების თანახმად, მწერალთა სახლს „ქართული ოცნების“ დეპუტატი ქეთი დუმბაძე უხელმძღვანელებს. აღნიშნულის შესახებ ინფორმაცია 10 აგვისტოს გავრცელდა. 2019 წლიდან, მწერალთა სახლს ნატა ლომოური ხელმძღვანელობდა, თუმცა აგვისტოს დასაწყისში აცნობეს სამიანობის ვადის ამოწურვის შესახებ. ქეთევან დუმბაძე საკუთარი უფლება-მოვალეობის შესრულებას 2023 წლის 4 სექტემბრიდან შეუდგება.