ზუგდიდელი ელენე ქობალია, ბათუმის შოთა რუსთაველის სახელობის სახელმწიფო უნივერსიტეტის მეორე კურსის სტუდენტია. პროფესიად არქიტექტურა აირჩია. როგორც ამბობს, ამ გადაწყვეტილებამდე, ხელოვნებისა და მათემატიკის სიყვარულმა მიიყვანა.

პარალელურად, ევროკავშირის მიერ დაფინანსებულ სხვადასხვა საგრანტო პროგრამაში ჩართვა გადაწყვიტა. მიზნის მისაღწევად, უამრავი აპლიკაცია შეავსო, რამაც შედეგი გამოიღო და 18 წლის ახალგაზრდა რუმინეთში გაემგზავრა.

,,ძალიან მნიშვნელოვანი იყო ჩემთვის რუმინეთში წასვლა, აქამდე უამრავი განცხადება მქონდა შევსებული... მთავარი ის იყო, რომ არასდროს არ მიფიქრია, ახლა შევწყვეტ, დავნებდები, მქონია იმედგაცრუებაც, სწორედ ამ დროს შევავსე ეგ აპლიკაცია და პასუხი რომ მოვიდა, აი, ძალიან გავიხარე“, - ყვება ელენე.

ახლა ის დარწმუნებულია, რომ თუ ადამიანს აქვს მოტივაცია, მონდომება და სურვილი, რომ გამოცდილება შეიძინოს, ყველაფერი გამოუვა.

ამჟამად, ლატვიაში იმყოფება, სადაც სხვა მოკლევადიანი პროგრამის ფარგლებში, ეკოლოგიასთან დაკავშირებულ ერთ - ერთ პროექტში მონაწილეობს.

..ამ კონკრეტული პროგრამის ფარგლებში ვეცნობით სოფლის ცხოვრებას, ამჟამად ვმუშაობთ ერთ - ერთ პროექტზე და ვაშენებთ თიხის სახლს, ვიძენთ ინფორმაციას პერმაკულტურის პრინციპების შესახებ და ვსწავლობთ, რა წვლილი შეგვიძლია შევიტანოთ ეკოლოგიის განვითარების მიმართულებით’’, - ამბობს ის.

ელენეს მიაჩნია, რომ გაცვლით პროგრამებში ჩართულობა მისთვის საუკეთესო შესაძლებლობაა, რომ განათლებასთან ერთად, ევროპაში საჭირო გამოცდილება მიიღოს და სწორი ნაბიჯები გადადგას.

„ჩემი აზრით, ახალგაზრდამ უნდა გამოიყენოს ეს შანსი და გაეცნოს ევროპულ ღირებულებებს, განათლებას, ცხოვრების სტილს. ის შესაძლებლობები, რომელსაც ევროპა გვაძლევს, შეუფასებელია ყველა კუთხით. კულტურის გაცნობა, ადამიანების გაცნობა, კონტაქტების შეძენა მსოფლიოს სხვადასხვა კუთხიდან გასაოცარია და მოხარული ვარ, რომ მომეცა ეს შესაძლებლობა’’, - გვეუბნება ზუგდიდელი ახალგაზრდა.

ელენე თვლის, რომ აკადემიური და არაფორმალური განათლების მიღებასთან ერთად, ახლგაზრდებმა საკუთარი მოქალაქეობრივი პოზიციაც უნდა გამოხატონ. ამიტომაც, მალე საქართველოში დაბრუნდება, რომ მომავალ საპარლამენტო არჩევნებში მოხალისე დამკვირვებელი გახდეს.

,,ვაპირებ რომ გავხდე დამკვირვებელი არჩევნებზე და შევიტანო ჩემი წვლილი ყველანაირად, ეს იქნება ხალხის ინფორმირება, სოცქსელებში აქტიურობა, ვფიქრობ, რომ თითოეულმა ახალგაზრდამ, რომელსაც სურს ევროპა, პროგრესული მომავალი ეს ნაბიჯი უნდა გადადგას 26 ოქტომებრს’’, - გვითხრა მან.

ამ ეტაპზე, საკუთარი თავით და შედეგებით კმაყოფილია, სამომავლოდ, კი სწავლის გაგრძელებას ევროპაში გეგმავს.

,,დარწმუნებული ვარ ერთ მშვენიერ დღეს ეს ყველაფერი სისრულეში მოვა, სწავლის დასრულების შემდგომ ვაპირებ, რომ დავბრუნდე ჩემს ქვეყანაში, ამდენ ცოდნას სწორედ, იმიტომ ვიძენ, რომ ჩემს ქვეყანას მოვახმარო, ჩემი აზრით ჩემს ქვეყანას ვჭირდები მე და ჩემი კომპეტენცია’’.

ეს სტატია მომზადდა ევროკავშირისა და გაეროს განვითარების პროგრამის ფინანსური მხარდაჭერით. მის შინაარსზე პასუხისმგებელია მხოლოდ [ავტორი] და შესაძლოა არ ასახავდეს ევროკავშირისა და გაეროს განვითარების პროგრამის შეხედულებებს.

This article was produced with the financial support of the European Union and UNDP. Its contents are the sole responsibility of [AUTHOR] and do not necessarily reflect the views of the European Union and UNDP.