საბედნიეროდ, სამართალმა იზეიმა და სასამართლომ დამოუკიდებელი გადაწყვეტილება მიიღო, - ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის დღევანდელ სხდომაზე განაცხადა, რითაც ე.წ. ნავთლუღის სპეცოპერაციასთან დაკავშირებით სასამართლოს მიერ გუშინ მიღებულ გადაწყვეტილებას გამოეხმაურა. პრემიერის განცხადებით, კიდევ ერთხელ დადასტურდა, რომ წინა ხელისუფლების დროს საქმე გვქონდა მკვლელობებთან, წამებასთან, ადამიანების ტანჯვასთან, გაუპატიურებასთან. "გუშინ საქართველოს საზოგადოებამ იხილა სასამართლოს გადაწყვეტილებები ძალიან მძიმე საკითხთან დაკავშირებით, ეს იყო ნავთლუღის გახმაურებული საქმე, რომელსაც მოჰყვა სამი უდანაშაულო ახალგაზრდის ჩაცხრილვა. ეს იყო სისასტიკე, რომელიც გამოვლინდა იმდროინდელი ხელისუფლების მხრიდან. საბედნიეროდ, სამართალმა იზეიმა და სასამართლომ დამოუკიდებელი გადაწყვეტილება მიიღო. კიდევ ერთხელ დადასტურდა, რომ წინა ხელისუფლების დროს საქმე გვქონდა მკვლელობებთან, წამებასთან, ადამიანების ტანჯვასთან, გაუპატიურებასთან და ა.შ. მინდა, შევახსენო იმ ადამიანებს, რომლებიც ყოველდღიურად სტრესს და ქაოსს თესენ საზოგადოებაში - ხალხმა ძალიან კარგად დაინახა, რომ წლების განმავლობაში ჩამოყალიბებული დანაშაულებრივი რეჟიმი და სისტემა, რომელიც ებრძოდა საკუთარ მოქალაქეებს და ქვეყანას ანგრევდა, წარსულს ჩაბარდა. ახლა არის დრო, გავარკვიოთ, თუ ეს პოლიტიკოსები, რომლებიც აცხადებენ, რომ არიან ჩვენი ოპონენტები, რჩებიან მწამებლებისა და მკვლელების დამცველებად, ეს მათი არჩევანია. ჩვენ ვიტოვებთ უფლებას, განვაცხადოთ, რომ ასეთი ტიპის ოპონენტებთან საქმე არ გვექნება", - განაცხადა ირაკლი ღარიბაშვილმა.