ამის შესახებ სრულიად საქართველოს კათოლიკოს-პატრიარქმა, უწმინდესმა და უნეტარესმა, ილია მეორემ გუშინ საპატრიარქოში ბრძანა, სადაც მან ებრაულ დელეგაციას უმასპინძლა. ქართველთა და ებრაელთა 26-საუკუნოვანი მეგობრობის იუბილის ფარგლებში პატრიარქთან სტუმრად იმყოფებოდნენ ისრაელის პარლამენტის წევრები, ისრაელის ელჩი საქართველოში იუვალ ფუქსი და ქართული დიასპორის წარმომადგენლები. როგორც პატრიარქმა შეხვედრაზე აღნიშნა, საქართველო დღეს განიცდის მძიმე პერიოდს, დარღვეულია საქართველოს ტერიტორიული მთლიანობა. "დროებით საქართველო ვერ აკონტროლებს აფხაზეთსა და ცხინვალს. მაგრამ ჩვენ დარწმუნებული ვართ, რომ ეს დიდხანს არ გაგრძელდება. აფხაზეთი და ცხინვალი უნდა დაუბრუნდეს თავის პატრონს, საქართველოს. ეს საჭიროა საქართველოსთვისაც და მათთვისაც – აფხაზებისა და ოსებისთვის. ჩვენ დარწმუნებული ვართ, რომ ყველაზე დიდი ძალა, მატერიალური და ადამიანური ძალა, რომელიც ამაში ჩვენ დაგვეხმარება, ეს არის ისრაელი და ებრაელები", - ბრძანა უწმინდესმა.