2025 წლის I კვარტალში საქართველოში უმუშევრობის დონე წინა წლის შესაბამის პერიოდთა შედარებით 0.7 პროცენტული პუნქტით გაიზარდა და 14.7 პროცენტი შეადგინა. ამის შესახებ ინფორმაცია სტატისტიკის ეროვნულმა სამსახურმა გამოაქვეყნა.

საქსტატის ინფორმაციით, 2025 წლის პირველ სამ თვეში დაქირავებულთა რიცხოვნობა გაიზარდა 5.3 ათასი კაცით (0.6%) და 958.3 ათასს მიაღწია, ხოლო თვითდასაქმებულთა რაოდენობა 13.5 ათასით შემცირდა (3.0%) და 434.7 ათასი შეადგინა. ამავე პერიოდში უმუშევართა რაოდენობა გაიზარდა 10.8 ათასით (4.7%) და 239.4 ათასს გაუტოლდა.

ამასთან, როგორც ინფორმაციაში ვკითხულობთ, სამუშაო ძალის მონაწილეობის დონე (15 წლის და უფროსი ასაკის მოსახლეობაში) წინა წლის შესაბამის პერიოდთან შედარებით, 0.2 %-ით შემცირდა და 54.8%-ით განისაზღვრა, ხოლო დასაქმების დონის მაჩვენებელმა 0.5%-ით დაიკლო და 46.8 % გახდა.

სამუშაო ძალის მონაწილეობის დონე როგორც ქალაქის ისე სოფლის ტიპის დასახლებებში შემცირებულია 0.2 პროცენტული პუნქტით.

როგორც საქსტატში ამბობენ, უმუშევრობის დონე ტრადიციულად მაღალია კაცებში, ქალებთან შედარებით. 2025 წლის I კვარტალში, წინა წლის შესაბამის პერიოდთან შედარებით, აღნიშნული მაჩვენებელი 0.5%-ით არის გაზრდილი ქალებში, ხოლო კაცებში - 0.7% - ით და შესაბამისად 11.6 პროცენტს და 17.0 პროცენტს შეადგენს.