თენგო ჯგუშია სამეგრელო-ზემო სვანეთის გუბერნიის შენობაში ყვავილებით შევიდა და სამხარეო ადმინისტრაციაში მომუშავე პერსონალს დაურიგა. მისი თქმით, დღეს არის "ბედნიერების დღე" და ადგილობრივმა ხელისუფლებამ სწორედ ბედნიერების ინდექსზე უნდა იფიქროს.  

მან ასევე საკრებულოს ფოიეში ბრიფინგი გამართა. მისი თქმით, ეს არის საზოგადოების შენობა და მას აქვს სურვილი აქედან მიმართოს მოსახლეობას. მას შესვლის ნება  დაცვამ არ დართო და უთხრა, რომ მის გუბერნიაში შესვლას ხელმძღვანელებთან შეათანხმებდა, თუმცა ჯგუშია მათი ნებართვის გარეშე შევიდა.

"ნარცისი არის თავისუფლების და ბედნიერების სიმბოლო და არა გაყალბების - "ოცნებამ" უკვე დაიწყო გაყალბება. ეს შენობა რატომაა "ქართული ოცნების" ან რომელიმე პარტიის, მაქვს სურვილი, რომ აქედან მივმართო მოსახლეობას", - აღნიშნა მან.
სამეგრელოს ხმის ლიდერის თქმით, მერის არჩევნების, რომლის თარიღიც ჯერ არ არის დასახელებული, გაყალბება დაიწყო. მისი ინფორმაციით, მას ერთ-ერთმა საჯარო მოხელემ შეტყობინება გამოუგზავნა, სადაც მისივე მტკიცებით "ქართული ოცნება" მთავარ ოფისში ყველა მოსამსახურეს 7 კაციანი სია მიტანას სთხოვს. მისივე მტკიცებით, გაყალბებას სათავეში სამეგრელო-ზემო სვანეთის გუბერნატორი ალექსანდრე მოწერელია უდგას, რომელიც შს მინისტრის გიორგი გახარიას დავალებას ასრულებს.

"ერთ-ერთმა საჯარო მოხელემ გამომიგზავნა შეტყობინება, მისივე უსაფრთხოების გამო არ ვასახელებ ვინაობას. შეტყობინებაში წერია, რომ ქართული ოცნება მათ ავალებს შვიდკაციანი სიის მიტანას, პირადობების მოწმობითა და ტელეფონის ნომრებით. ეს შვიდი კაცი უნდა იყოს მმართველი პარტიის მიერ დასახელებული კანდიდატის მხარდამჭერი. გაყალბების სცენის ავტორის სამწუხაროდ ბატონი მოწერელიაა", - ამბობს ჯგუშია.

მან ჟურნალისტებს უთხრა, რომ თუ "ქართული ოცნება" ზუგდიდში მერობის კანდიდატს დაასახელებს, ის კენჭს დამოუკიდებლად იყრის.

"მერობა არ იყო ჩემი სურვილი. მე ვემზადებოდი საპარლამენტო არჩევნებისთვის, თუმცა თუ ქართული ოცნება იკადრებს კანდიდატის დასახელებას, იმის შემდეგ, რაც ზუგდიდის მერი კორუფციული გარიგებისთვის დააკავეს. მე ვიყრი კენჭს,რომ მოსახლეობა არ დარჩეს მარტო, ამ შვიდწლიან რეჟიმთან", - აღნიშნა ჯგუშიამ.

ზუგდიდი მერის რიგგარეშე არჩევნები გაზაფხულზე ჩატარდება.