პარლამენტში ინიცირებული "შინაურ ბინადარ ცხოველთა შესახებ" კანონპროექტის მიხედვით, შინაური ცხოველის მოვლა-პატრონობასთან დაკავშირებული ვალდებულებების დარღვევაზე ადმინისტრაციული პასუხისმგებლობა დაწესდება.

საკანონმდებლო პაკეტის მიხედვით, ცხოველის მიტოვებისთვის ფიზიკური პირი 3000-ით, ხოლო იურიდიული პირი 5000 ლარის ოდენობით დაჯარიმდება.

ამავე ინფორმაციით, სანქციები ასევე ეხება ყოველწლიური ვეტერინარული შემოწმების, ვაქცინაციის და სხვა საჭირო სამკურნალო-პროფილაქტიკური ღონისძიებების ჩატარების ვალდებულების დარღვევასაც.

კერძოდ, ამ სახის დარღვევაზე მეპატრონე ან შინაური ცხოველის მიმკედლებლისთვის 100 ლარის ოდენობის ჯარიმაა გათვალისწინებული.

"იდენტიფიკაცია-რეგისტრაციის მოთხოვნების დარღვევაზე პირი 100 ლარის ოდენობით დაჯარიმდება.

მომეტებული რისკის ჯიშის ძაღლის იდენტიფიკაცია-რეგისტრაციის მოთხოვნების დარღვევა 200 ლარით დაჯარიმდება.

ნარევი (მეტისი) ჯიშის შინაური ბინადარი ცხოველის (ძაღლი, კატა) სტერილიზაცია/კასტრაციის მოთხოვნების დარღვევისთვის გათვალისწინებულია ჯარიმა 300 ლარის ოდენობით.

ცხოველის ყოლისათვის დადგენილი რაოდენობრივი შეზღუდვის დარღვევა გამოიწვევს მეპატრონის დაჯარიმებას 300 ლარის ოდენობით.

მუნიციპალიტეტის უფლებამოსილი ორგანოსთვის ხელის შეშლა მიკედლებული შინაური ბინადარი ცხოველის სტერილიზაცია/კასტრაციის, ვაქცინაციის ან ცოფზე დაკვირვების მიზნით გადაყვანისას გამოიწვევს პირის დაჯარიმებას 300 ლარის ოდენობით

მეპატრონის ვალდებულებების დარღვევისათვის, რასაც შედეგად მოჰყვა სხვა ცხოველის ან ადამიანის ჯანმრთელობის მსუბუქი დაზიანება, გამოიწვევს მეპატრონის ან მფლობელის დაჯარიმებას 500 ლარის ოდენობით", - მითითებულია ინფორმაციაში.

ამავე კანონპროექტით, დადგენილი მოთხოვნების დარღვევით მომეტებული რისკის ჯიშის (30 ჯიში) ძაღლის გამრავლებაზე დაწესდება სანქციები.

საქმე ეხება ძაღლის შემდეგ სახეობებს:

ამერიკული პიტ ბულ ტერიერი ტოსა ინუ; ფილა ბრაზილეირო; ბულტერიერი; ამერიკული სტაფორდშირის ტერიერი; არგენტინული დოგი; ტოსა ინუ; ამერიკული ბულდოგი; კანგალი; კანე კორსო; დობერმანი; კავკასიური ნაგაზი; შუააზიური ნაგაზი; აღმოსავლეთ ევროპული ნაგაზი; ბერძნული ნაგაზი; კრაშის ნაგაზი; გერმანული ნაგაზი; რუმინული ნაგაზი; მასტიფები; ბორდოული დოგი; კანარის დოგი; როტვეილერი; რიზენშნაუცერი; ლეონბერგერი; მარემა; მოსკოვური საყარაულო; კა-დე-ბო (მალიორკის მასტიფი); სტაფორდშირ ბულ ტერიერი; ბანდოგი; გულდონგი; მგლის ჰიბრიდები.

სამართალდამრღვევი ფიზიკური პირი 1500 ლარით დაჯარიმდება, ხოლო იურიდიული პირის 2000 ლარით.

მომეტებული რისკის ჯიშის ძაღლის იმპორტის, გამრავლების თაობაზე აკრძალვისა და დროებითი შემოყვანის წესის დარღვევა ითვალისწინებს ფიზიკური პირის დაჯარიმებას 5 000 ლარის ოდენობით, ხოლო იურიდიული პირის დაჯარიმებას 10 000 ლარის ოდენობით.