სამოქალაქო სოლიდარობის ფონდი ზუგდიდში აანონსებს „აგენტების კანონის“ საწინააღმდეგო აქციას სლოგანით: „არა რუსულ კანონს! კი ევროპას!“

აქციის ორგანიზატორები მოქალაქეებს მოუწოდებენ, 29 აპრილს, 18 საათზე, შეიკრიბონ მერიასთან, "რათა კიდევ ერთხელ უჩვენონ ხელისუფლებას, რომ არ ეგუებიან ქვეყნის რუსეთისკენ სვლას".

„არის დრო, როდესაც დუმილი ბოროტების მხარეს დგომას ნიშნავს. ასეთი დროა აქ და ახლა.

როდესაც ხელისუფლება ცდილობს ქვეყანა რუსეთისკენ წაიყვანოს. ერთის მხრივ რუსული კანონით ცდილობს ჩამოიშოროს ყველა, ვინც მის ქვეყნისთვის მტრულ ინტერესებს ეწინააღმდეგება, მეორეს მხრივ კი ცდილობს, ოფშორების კანონით სასათბურე პირობები შექმნას უკონტროლო ფინანსების შემოდინებისა და შავი ფულის გათეთრებისთვის - ჩვენ გვრჩება ერთადერთი გზა, გამოვიდეთ და ხმამაღლა ვთქვათ - არა რუსულ კანონს!

თუ ფიქრობ, რომ საქართველოსთვის ევროინტეგრაცია მნიშვნელოვანია, რომ ეს ერთადერთი სწორი გზაა ქვეყნის სოციო-ეკონომიკური განვითარებისთვის, უსაფრთხოებისთვის, ტერიტორიული მთლიანობისთვის მაშინ შენი ადგილი ჩვენს გვერდითაა და შენი ხმა მნიშვნელოვანია!“, - ვკითხულობთ განცხადებაში.

"აგენტების" კანონის წინააღმდეგ პროტესტის გამოსახატად ზუგდიდელები მერიასთან 17 და 18 აპრილსაც შეიკრიბნენ, რა დროსაც საქართველოს პარლამენტის მიერ "უცხოური გავლენის გამჭვირვალობის შესახებ" კანონპროექტის პირველი მოსმენით მიღება გააპროტესტეს.

მანამდე 15 აპრილს, მოქალაქეებმა, სამოქალაქო საზოგადოების წევრებთან და პოლიტიკოსებთან ერთად, გააპროტესტეს ე.წ უცხოელი აგენტების კანონის საკანონმდებლო ორგანოში ხელმეორედ დაინიცირება. აქცია მიმდინარეობდა სლოგანით: "არა რუსულ კანონს"

ინფორმაციისთვის, მმართველი პარტია „ქართული ოცნება“, „აგენტების კანონის“ მხარდამჭერი კონტრაქციის ჩატარებას, 29 აპრილს, თბილისში გეგმავს. ამის შესახებ პარტიამ განცხადება 22 აპრილს გაავრცელა და აღნიშნა, რომ ეს „მხარდამჭერთა თხოვნაა“.

საქართველოს პარლამენტმა, 83 ხმით, "უცხოური გავლენის გამჭვირვალობის შესახებ" კანონპროექტი პირველი მოსმენით 17 აპრილს მიიღო.

მის განხილვას საკანონმდებლო ორგანოში წინ უძღოდა "ქართული ოცნების" წევრებსა და ოპოზიციონერ დეპუტატებს შორის ხმაური და დაპირისპირება.

კანონპროექტის 83 მხარდამჭერიდან ზუგდიდელი, ხობელი და ფოთელი დეპუტატებიც არიან.

აგენტების კანონს პირველი მოსმენით მხარი დაუჭირეს ქალაქ ზუგდიდის ყოფილმა მაჟორიტარმა მერაბ ქვარაიამ, ზუგდიდის მუნიციპალიტეტის ყოფილმა გამგებელმა და მოგვიანებით, მაჟორიტარმა ედიშერ თოლორაიამ, ხობის ყოფილმა მაჟორიტარმა ირაკლი (დაჩი) ბერაიამ და ქალაქ ფოთის მაჟორიტარმა გიორგი ხახუბიამ. თოლორაიამ და ბერაიამ კანონს ხმა გასულ წელსაც მისცეს, ისევე, როგორც შემდეგ მის გაწვევას. პირველი მოსმენით კანონს, შარშანდლის მსგავსად, მხარი დაუჭირა მესტიის ყოფილმა მაჟორიტარმა ვიქტორ ჯაფარიძემაც.

ევროკავშირმა და ამერიკის შეერთებულმა შტატებმა საქართველოს ხელისუფლება არაერთხელ გააფრთხილეს, რომ კანონის მიღება უარყოფითად იმოქმედებს ევროკავშირისკენ საქართველოს სვლაზე.

ევროპარლამენტმა 25 არპილს მიიღო რეზოლუცია, რომელშიც კომისიასა და ბლოკის წევრ სახელმწიფოებს მოუწოდებს არ დაიწყოს მოლაპარაკებები საქართველოსთან ევროკავშირში გაწევრიანების შესახებ, სანამ ე.წ. უცხოეთის აგენტების კანონი დღის წესრიგიდან არ მოიხსნება.