ევროპის საბჭოს ჟურნალისტთა უსაფრთხოების პლატფორმის პარტნიორი ორგანიზაციებისა და მედიის თავისუფლების სწრაფი რეაგირების (MFRR) კონსორციუმის წევრებმა საქართველოში ორდღიანი მისია დაასრულეს და ქვეყანაში მედიის თავისუფლების ხარისხი შეაჯამეს.

კვლევის მიხედვით, საქართველოში გაუარესდა როგორც პრესის თავისუფლების, ასევე ზოგადად ადამიანის უფლებების მდგომარეობა. ხელისუფლება იყენებს მრავალფეროვან ინსტრუმენტებსა და მექანიზმებს განსხვავებული ხმების, მათ შორის დამოუკიდებელი ჟურნალისტების, დისკრედიტაციისა და შეზღუდვისთვის.

მათი თქმით, სახეზეა დემოკრატიის უკუსვლა და ადამიანის უფლებათა დარღვევები, რაც სცდება მედიის პლურალიზმის ეროზიასა და პრესის თავისუფლების შელახვას.

„მთლიანად სამოქალაქო საზოგადოება აწყდება არალიბერალურ ტენდენციას, რომელიც ხასიათდება დემოკრატიული შეკავებისა და ბალანსის მექანიზმების შესუსტებით. ჟურნალისტებს თავს ესხმიან ფიზიკურად, ვერბალურად, იურიდიულად და ფინანსურად. ჟურნალისტიკა საქართველოში სახიფათო პროფესია გახდა.

ისინი იმდენად შეშფოთებულნი არიან თავიანთი უსაფრთხოებით, რომ ზოგიერთი მათგანი ჟურნალისტურ დავალებებზე თანმხლებ პირებს იყვანს. რამდენიმე მედია საშუალების წარმომადგენლებმა აღნიშნეს, რომ ჟურნალისტები ტოვებენ პროფესიას, ზოგიერთი კი ემიგრაციაში მიდის. გარდა ამისა, რამდენიმე მედია გეგმავს საზღვარგარეთ დარეგისტრირებას“, - აღნიშნავს ორგანიზაცია.

MFRR - ის ცნობით, საჯარო უწყებები ხშირად არ ასრულებენ კანონით გათვალისწინებულ მოთხოვნებს ჟურნალისტებისთვის საჯარო ინფორმაციის მისაწოდებლად. ინფორმაციის მიღება განსაკუთრებით უჭირთ კრიტიკულ და დამოუკიდებელ მედიებს.

მისიის წევრები იყვნენ: მედიის საკითხზე მომუშავე არასამთავრობო ორგანიზაციების - ჟურნალისტთა დაცვის კომიტეტი (CPJ), ჟურნალისტთა ევროპის ფედერაცია (EFJ), პრესისა და მედიის თავისუფლების ევროპული ცენტრი (ECPMF), ცენზურის ინდექსი, პრესის საერთაშორისო ინსტიტუტი (IPI), ფონდი სამართლიანობა ჟურნალისტებისთვის და რეპორტიორები საზღვრებს გარეშე (RSF).