აფხაზური ოპოზიციის მომხრეებმა, ოჩამჩირის რაიონის სოფელ აძიუბჟასათან მდებარე კოდორის ხიდი გახსნეს, მას შემდეგ, რაც მათთან დე ფაქტო რესპუბლიკის პარლამენტის „დეპუტატები“ და რაიონის ე.წ. ადმინისტრაციის ხელმძღვანელმი ბესლან ბიგვავა მივიდა.

მანამდე, ტელეგრამის არხები წერდნენ, რომ კოდორის ხიდზე აქციის მონაწილეებსა და პოლიციელებს შორის დაპირისპირება მოხდა.

ამავე ცნობით, ჯერ ისევ გადაკეტილია ზემო და ქვემო გუმისთის ხიდები. მათზე მხოლოდ საზოგადოებრივ ტრანსპორტს ატარებენ.

პროტესტის მონაწილეები 5 აფხაზი ოპოზიციონერის გათავისულფლებას ითხოვენ. ისინი სამართალდამცავებმა მაშინ დააკავეს, როდესაც აქტივისტები ბრუნდებოდნენ გუდაუთიდან, სადაც საზოგადოების შეკრება ჩატარდა მოსკოვსა და სოხუმს შორის ახლახან ხელმოწერილი „საინვესტიციო საქმიანობის შეთანხმების“ განსახილველად.  მათ დაკავებას ახლობლების და მხარდამჭერების საპროტესტო აქცია და ავტომაგისტრალის გადაკეტვა მოჰყვა.

ამასთან დაკავშირებით, აფხაზმა ლიდერმა ასლან ბჟანიამ ე.წ. უშიშროების საბჭოს საგანგებო სხდომა მოიწვია.

11 ნოემბერს, აფხაზეთის დე ფაქტო რესპუბლიკის „პარლამენტის“ სხდომაზე მეორე მოსმენით დაამტკიცეს კანონპროექტი „მრავალფუნქციური კომპლექსების სამართლებრივი სტატუსის მოწესრიგების შესახებ“ . ტელეგრამის არხების თანახმად, აფხაზური ოპოზიცია ეწინააღმდეგება აღნიშნულ კანონპროექტის ამგვარ განსაზღვრებას და მიიჩნევს, რომ ის რუსეთთან საინვესტიციო შეთანხმების რატიფიცირების წინაპირობაა.

ცნობისთვის, „აპარტამენტების“ შესახებ კანონპროექტი ოკუპირებული აფხაზეთის პარლამენტმა ივლისში უკან გაიწვია.

ოქტომბრის ბოლოს სოხუმმა ხელი მოაწერა მოსკოვის მიერ მოთხოვნილ კიდევ ერთ შეთანხმებას, რომელიც რუსულ კომპანიებს აფხაზეთში საინვესტიციო პროექტების განხორციელების საშუალებას აძლევს.

დოკუმენტის ძალაში შესვლის პროცედურა ითვალისწინებს ე.წ. პარლამენტში მის სავალდებულო რატიფიცირებას.

აფხაზური ოპოზიციის ნაწილი ამ დოკუმენტის წინააღმდეგ გამოდის და მიაჩნია, რომ ეს გამოიწვევს "ოლიგარქიის გაფართოებას".

ცნობისთვის, 1 სექტემბრიდან მოსკოვმა შეაჩერა ოკუპირებული აფხაზეთის ბიუჯეტის დაფინანსება, მათ შორის, საინვესტიციო ხელშეკრულების დამტკიცების მოთხოვნით.