აფხაზეთის დე ფაქტო რესპუბლიკის საგარეო საქმეთა სამინისტრომ, სოხუმში, 15 ნოემბერს განვითარებული მოვლენები „აფხაზეთში გადატრიალების მცდელობად“ შეაფასა.

„რაც მოხდა, ზიანს აყენებს ჩვენი ქვეყნის საერთაშორისო იმიჯს და უარყოფითად აისახება ურთიერთობაზე ჩვენს სტრატეგიულ მოკავშირესთან, რუსეთის ფედერაციასთან“, - ნათქვამია განცხადებაში, რომელსაც დე ფაქტო საგარეო ავრცელებს.
ამავე ცნობით, აფხაზი ლდერი ასლან ბჟანია "რესპუბლიკაშია და აგრძელებს ქვეყნის ხელმძღვანელობას. მიიღება ყველა საჭირო ზომა სახელმწიფოს სტაბილურად ფუნქციონირების უზრუნველსაყოფად“, - ნათქვამია განცხადებაში.

აფხაზური ოპოზიცია უარს ამბობს შეასრულოს ასლან ბჟანიას მოთხოვნა „სამთავრობო“ შენობების დაცლასთან დაკავშირებით.

ისინი „ხელისუფლებას“ კომპრომისული წინადადებით მიმართავენ:

„წინ საპრეზიდენტო არჩევნებია. როგორც გავიგე, მათში მონაწილეობას ასლან ბჟანიაც აპირებს. მაგრამ რომც არ მიიღოს მონაწილეობა არჩევნებში, ალბათ, ხელისუფლების გუნდიდან ვიღაცას მოუნდება კენჭი იყაროს. თუ გადავწყვეტთ, რომ მოქმედი ვიცე-პრეზიდენტი (ბადრა გუნბა) პრეზიდენტის მოვალეობის შემსრულებლად დარჩება, მაშინ მინისტრთა კაბინეტი მთლიანად გადადგება. დღევანდელი პრემიერის ადგილზე ჩვენგან ინიშნება ადამიანი, კომპრომისული პიროვნება. ამ გზით ვაბალანსებთ აღმასრულებელ ხელისუფლებას, რათა მომავალ საპრეზიდენტო არჩევნებზე ადმინისტრაციული რესურსი არ იყოს გამოყენებული დღევანდელი გუნდის წარმომადგენლის მხარდასაჭერად“, - განაცხადა არძინბამ.

მისი თქმით, ასლან ბჟანიას რამდენიმე დელეგაცია გაუგზავნეს.

„დილამდე ითხოვა დრო, ამბობს, რომ გადადგება - ჰოდა, გააკეთოს!“, - აღნიშნა არძინბამ.

17 ნოემბერს პროეტსტის მონაწილეებმა განაცხადეს, რომ იმ შემთხვევაში, თუ ასლან ბჟანიას გადადგომის მოთხოვნა არ დაკმაყოფილდება, ოპოზიციის საკოორდინაციო საბჭომ, შესაძლოა, დროებითი მთავრობა შექმნას.

მასშტაბური აქციები სოხუმში 15 ნოემბერს დაიწყო. დილიდან აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი. თვადაპირველად, აქციის მონაწილეები, რუსეთთან საინვესტიციო ხელშეკრულების გაუქმებას ითხოვდნენ, უფრო გვიან კი მთავარი მოთხოვნა გააჟღერეს - „პრეზიდენტის უპირობო გადადგომა“.