ბელორუსის ავტორიტარი ლიდერი ალექსანდრე ლუკაშენკო აფხაზეთში 300 - ნომრიანი, ხუთვარსკვლავიანი სასტუმროს და საკურორტო კომპლექსის აშენებას გეგმავს, სამკურნალო-სარეაბილიტაციო სპა-ცენტრით და ტალახის წყაროებით.

ამის შესახებ ბელორუსმა პოლიტოლოგმა დიმიტრი ბოლკუნეცმა ისაუბრა, „აფხაზეთის ახალი ამბების პორტალზე“ დაყრდნობით. ტელეგრამის არხმა, მანამდე გამოქვეყნა დოკუმენტები, რომლებიც, სავარაუდოდ, აფხაზი საჯარო პირების ოფისებში იყო ნაპოვნი, წერს „ეხო კავკაზა“.


„ასევე იგეგმება სამი რესტორნის, დახურული და ღია საცურაო აუზების, საბავშვო და რეკრეაციული ზონის, სპორტული მოედნების მოწყობა, ასევე ცალკე 8 VIP - სახლის განთავსება. კომპლექსთან, სულ მცირე, ორი ნავმისადგომის აშენება იგეგმება. რომელთაგან ერთ-ერთი იქნება VIP იახტებისთვის“, - წერს ბოლკუნეცი.

ცნობისთვის, 13 ოქტომბერს ბელარუსის საგამოძიებო ცენტრმა გამოაქვეყნა საგამოძიებო მასალა, რომლის მიხედვითაც, 2022 წლის 28 სექტემბერს ლუკაშენკოს ოკუპირებულ აფხაზეთში ვიზიტის შემდეგ, მის მიერ კონტროლირებად კომპანიას, 20 ჰექტარზე განთავსებული მიწის ნაკვეთი გადაეცა, „დიდი საინვესტიციო პროექტის განსახორციელებლად“, კერძოდ კი ოჩამჩირის რაიონის სოფელ კინდღში, შავი ზღვის სანაპიროზე, სანატორიუმის და საკურორტო კომპლექსის მშენებლობისთვის. 

აფხაზეთის თვითგამოცხადებული რესპუბლიკის ე.წ. გენერალურმა პროკურორმა, ადგურ აგრბამ, უხეშად უპასუხა ბელარუსის საგამოძიებო ცენტრის მოთხოვნას, რომელმაც აფხაზურ „საგამოძიებო უწყებასთან“ დეტალების გარკვევას ცდილობდა.

ალექსანდრე ლუკაშენკოს აფხაზეთის დამოუკიდებლობა არ უღიარებია, თუმცა, 2022 წლის 28 სექტემბერს ის ოკუპირებულ აფხაზეთში ჩავიდა და ასლან ბჟანიას ბიჭვინთაში შეხვდა.

მანამდე, 2022 წლის აგვისტოში, ასლან ბჟანიამ განაცხადა, რომ „აფხაზეთი მზადაა რუსეთ-ბელორუსის სამოკავშირეო სახელმწიფოს შეუერთდეს“.