შვედური ორგანიზაციის, Kvinna till Kvinna-ს („ქალები ქალებისათვის“) სამხრეთ კავკასიისა და აღმოსავლეთ ევროპის რეგიონული დირექტორი, რეგინა ეგოროვა - ასკეროვა, რომელიც 15 წელია საქართველოში ცხოვრობს, ქვეყანაში არ შემოუშვეს.

რეგინა ეგოროვა-ასკეროვა ყოფილი ჟურნალისტია, ის საქართველოში ოჯახთან, მეუღლესთან და ორ მცირეწლოვან შვილთან ერთად ცხოვრობს.

20 მარტს მან ფეისბუკზე დაწერა: „ზუსტად 15 წლის შემდეგ, ჩემს საყვარელ საქართველოში შემოსვლის უფლება არ მომცეს, ეს ცხადად აჩვენებს, თუ სად იმყოფება ახლა ქვეყანა“, - წერს ეგოროვა - ასკეროვა.

მან გამოაქვეყნა შინაგან საქმეთა სამინისტროს თანამშრომლების მიერ საზღვარზე გადაცემული დოკუმენტი, რომელშიც საზღვრის კვეთაზე უარის მიზეზი დაუზუსტებელია - მითითებულია „სხვა მიზეზი“.

მისი თქმით, იგი ახსნა-განმარტების გარეშე დააბრუნეს უკან.

წლების წინ, რეგინა ეგოროვა-ასკეროვა ზუგდიდში, რადიო „ათინათში“ მუშაობდა, როგორც გაცვლითი მოხალისეობრივი პროგრამის მონაწილე.