რუსეთის პრომსვიაზბანკის წარმომადგენლები აფხაზეთში ჩავლენ და რუსულ საბანკო ბარათებს, აფხაზეთში მუდმივად მცხოვრებ რუსეთის მოქალაქეებს, ადგილზე გაუფორმებენ. 2025 წლის 1 ივლისამდე კი პენსიონერები ძველი სქემებით  მიიღებენ საპენსიო ანაზღაურებას.

ამის შესახებ, დე ფაქტო რესპუბლიკის „პრეზიდენტის“ ბადარა გუნბასა და რუსეთის პრეზიდენტის ადმინისტრაციის ხელმძღვანელის მოადგილის სერგეი კირიენკოს „აფხაზეთის სბერბანკში“ გამართულ შეხვედრაზე გახდა ცნობილი.

ბადრა გუნბამ ასეთი გადაწყვეტილებისთვის მადლობა გადაუხადა კირიენკოს და აღნიშნა, რომ „პენსიონერებს ძალიან უჭირთ საზღვრების გადაკვეთა საპენსიო დოკუმენტების მისაღებად".

"ვიცი, რომ ამ საქმის უკან უზარმაზარი სამუშაო დგას. ვფიქრობ და დარწმუნებული ვარ, რომ ჩვენი მოქალაქეები დააფასებენ იმას, რასაც აკეთებთ", - თქვა მან.

თავის მხრივ, კირიენკომ აღნიშნა, რომ მას შემდეგ, რაც გუნბამ ვლადიმერ პუტინთან შეხვედრაზე ეს თხოვნა გააჟღერა, რუსეთის პრეზიდენტმა  „მკაცრი ბრძანებები მისცა მათ, ამ შეხვედრის შედეგების მიხედვით“ და დასძინა:

„ის, რაზეც თქვენ შეათანხმეთ რუსეთის პრეზიდენტთან, აუცილებლად შესრულდება“.

1 მარტს ოკუპირებულ აფხაზეთში "საპრეზიდენტო" არჩევნების მეორე ტური გაიმართა, რომელშიც ბადრა გუნბამ გაიმარჯვა, დე ფაქტო ცესკოს მონაცემებით, მან ხმების 54,73%, ხოლო მისმა მეტოქემ, ოპოზიციონერმა ადგურ არძინბამ - 41,54%.

2 მარტს რუსეთის პრეზიდენტმა, ვლადიმერ პუტინმა გუნბას გამარჯვება მიულოცა.

5 მარტს პუტინმა გუნბა კრემლში მიიღო, ამასთან, აფხაზებისთვის ორმაგი მოქალაქეობის და სხვა საკითხების, მოგვარებას დაჰპირდა.

შეხვედრის შემდეგ გავრცელდა ინფორმაცია, რომ „აფხაზეთის მოქალაქეებისთვის“ რუსული მართვის მოწმობები გამარტივებული წესით გაიცემა.

ბადრა გუნბას, "ინაუგურაცია", სოხუმში 2 აპრილს გაიმართა.

იმავე დღეს ცნობილი გახდა, რომ პუტინმა გუნბა ბადრა გუნბა 9 მაისს, ფაშიზმზე გამარჯვების 80 წლისთავის აღსანიშნავ ღონისძიებაზე მოსკოვში მიიწვია.

ცნობისთვის, რუსეთის პრეზიდენტმა, ყოფილი აფხაზი ლიდერი ასლან ბჟანია, 2024 წლის 9 მაისს, მოსკოვში სამხედრო აღლუმზე დასასწრებად არ მიიწვია.

მანამდე სოციალურ ქსელებში გავრცელდა ინფორმაცია, რომ ბჟანია არც ვლადიმერ პუტინის ინაუგურაციაზ ესწრებოდა, რომელიც 7 მაისს გაიმართა.

ვადამდელი „საპრეზიდეტო“ არჩევნები ოკუპირებულ აფხაზეთში მას შემდეგ დაინიშნა, რაც ყოფილი “პრეზიდენტი” ასლან ბჟანია თანამდებობიდან 2024 წლის 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. პასუხად, მაშინ მოსკოვმა სოხუმს სრულად შეუჩერა დაფინანსება.