საპარლამენტო უმცირესობა სოციალურ ქსელში გავრცელებულ ფოტომასალას ეხმაურება, სადაც ზურაბ ჟვანიას და რაულ იუსუპოვის ცხედრებია ასახული. როგორც ჟურნალისტებთან საუბრისას საპარლამენტო უმცირესობის წევრები აცხადებენ, მსგავსი საქციელით ხელისუფლება ცდილობს გადაფაროს ის მოვლენები, რომელიც ქვეყანაში ხდება. შეგახსენებთ, რომ გუშინ, 19 მარტს სოციალურ ქსელში ფოტოები, სახელწოდებით "სააკაშვილი მკვლელი" გავრცელდა. ფოტომასალაში ნაჩვენებია საქართველოს ყოფილ პრემიერ-მინისტრ ზურაბ ჟვანიასა და მასთან ერთად გარდაცვლილი რაულ იუსუპოვის ცხედრების ფოტოები. გავრცელებული ფოტოების მიხედვით, ცხედრებს სხვადასხვა სახის დაზიანება აღინიშნებათ. ფოტომასალა "იუთუბიზე" ჰაკიმ ფაშას სახელით არის ატვირთული.