მახათას მთაზე, ივერიის ყოვლადწმინდა ღვთისმშობლის სახელობის ხატის სახელზე მშენებარე მონასტრის მიმდებარე ტერიტორიაზე , დღეს, ზეთისხილისა და ჰიმალაის კედრის ნერგები დარგეს. მახათას მთაზე პირველი ხე სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ დარგო. პატრიარქმა ტერიტორიაზე ზეთისხილისა და ჰიმალაის კედრის ნერგები დარგო. გამწვანების აქციამდე კათოლიკოს-პატრიარქმა მშენებარე ივერიის ღვთისმშობლის სახელობის ტაძარი დაათვალიერა, რომლის გადახურვა მიმდინარე წლის სექტემბერში დასრულდება. კათოლიკოს-პატრიარქმა ტაძარში პარაკლისი გადაიხადა. ღონისძიებას მთავრობის წევრები, პარლამენტის თავმჯდომარე დავით უსუფაშვილი და საზოგადოებისთვის ცნობილი სახეები ესწრებოდნენ. სულ აღნიშნულ ტერიტორიაზე 1 000 ზეთის ხილის ხე და 300 ჰიმალაის კედარი დაირგეს. ახლად დარგული ხეების მოვლას მეთვალყურეობას პატრიარქის მიერ დაფუძნებული ფონდი "გაამწვანე საქართველო" და ის პირები გაუწევენ, რომლებმაც დღეს ხეები დარგეს. გამწვანების აქციის ორგანიზატორი ტაძრის მშენებლობის ფონდი "ივერიისა" და პატრიარქის მიერ დაფუძნებული ფონდი "გაამწვანე საქართველო" იყვნენ. როგორც ფონდში აცხადებენ, ძვირფასი ზეთისხილის ნერგები ფონდს ბიზნესმენმა გიორგი სვანიძემ შემოწირა. მახათას მთაზე მშენებარე ტაძრის 2/3 უკვე აშენებულია. ტაძარს სრულიად საქართველო შემოწირულობებით ერთად აშენებს. როგორც ფონდ "ივერიისას" დამფუძნებელმა პაატა ბურჭულაძემ განაცხადა, მსგავსი აქციები მომავალშიც გაგრძელდება.