2014 წლის 1 სექტემბრიდან ქვეყანა ყველაზე საპასუხისმგებლო ეტაპზე გადადის - ჩვენ ვიწყებთა ასოცირების ხელშეკრულებით ნაკისრი ვალდებულებების შესრულებას , - ამის შესახებ საქართველოს პრემიერ-მინისტრმა ირაკლი ღარიბაშვილმა პარლამენტის დღევანდელ პლენარულ სხდომაზე განაცხადა. როგორც პრემიერმა აღნიშნა, ამ ვალდებულებების შესრულება საქართველოს მთავრობის საშინაო პოლიტიკის ერთ-ერთი მთავარი პრიორიტეტია. "ასოცირების შეთანხმების განხორციელება ქვეყნის პოლიტიკური, სოციალური და ეკონომიკური ცხოვრების მთელ სპექტრს შეეხება. შესაბამისად, ფართომასშტაბიანი რეფორმები მოემსახურება ადამიანის უფლებების დაცვის განმტკიცებას, დემოკრატიის გაღრმავებას, მეტ გამჭვირვალობას, ეფექტიან მმართველობას, უსაფრთხოებისა და რეგიონალური თანამშრომლობის განმტკიცებას, სტაბილური მაკროეკონომიკური გარემოსა და ხელსაყრელი ბიზნესკლიმატის ჩამოყალიბების უზრუნველყოფას. უნდა აღვნიშნო, რომ ეს შეთანხმება სრულ თანხვედრაშია მთავრობის სოციალურ-ეკონომიკური განვითარების ხედვასთან. ეს რეფორმები, საბოლოოდ, უზრუნველყოფს ქვეყნის ევროპული ტიპის დემოკრატიად ჩამოყალიბებას. ევროკავშირთან ასოცირების შეთანხმებიდან გამომდინარე, იგეგმება ადგილობრივი კანონმდებლობის ევროკავშირის კანონმდებლობასთან დაახლოება", - განაცხადა პრემიერ-მინისტრმა. ირაკლი ღარიბაშვილმა ცალკეულ სფეროებზეც ისაუბრა და ხაზი თითოეული მათგანის მიმართულებით დაგეგმილ რეფორმებს გაუსვა.