ოზურგეთში, სამაჩაბლოში გმირულად დაღუპული ზაზა დამენიას გარდაცვალებიდან 10 წელი აღნიშნეს. მის საფლავთან ოჯახის წევრები , ადგილობრივი ხელისუფლებისა და საზოგადოების წარმომადგენლები შეიკრიბნენ. ზაზა დამენიას დედა ციური წერეთელი  ადგილობრივ და ცენტრალურ ხელისუფლებას თხოვნით მიმართავს. "ყველას ვთხოვ, რომ ამ საკითხს მიაქციონ ყურადღება. როგორ შეიძლება ადამიანს ჰქონდეს მინიჭებული გმირის წოდება, იყოს საქართველოს ტერიტორიული მთლიანობისთვის დაღუპული და მის მშობელს მარჩენალდაკარგულის სტატუსი ჰქონდეს? ახლა მეუბნებიან, რომ ეს საკითხი აუცილებლად მოგვარდებაო და ვნახოთ, რა იქნება", - განაცხადა ციური წერეთელმა. ზაზა დამენიას საფლავთან იმყოფებოდნენ მისი მეუღლე ხათუნა ხუხუნაიშვილი და შვილი გიორგი დამენია. "10 წელი გავიდა ზაზას დაღუპვიდან. ძალიან გვიჭირს ზაზას გარეშე. ყოველთვის მიმძიმს მისი გახსენება და ძალიან მენატრება", - განაცხადა ხათუნა ხუხუნაიშვილმა. ზაზა დამენია 2004 წლის აგვისტოში ცხინვალის მისადგომებთან იბრძოდა. 16 აგვისტოს იმ სანგარზე, სადაც ზაზა დამენია იმყოფებოდა, შეტევა განხორციელდა. მოწინააღმდეგემ სანგარში ხელყუმბარის ჩაგდება მოახერხა, მას ზაზა დამენია გადაეფარა და საკუთარი სიცოცხლის ფასად თანამებრძოლები დაღუპვისგან იხსნა. საქართველოს ყოფილი პრეზიდენტის მიხეილ სააკაშვილის 2004 წლის 26 აგვისტოს განკარგულებით, ზაზა დამენიას ეროვნული გმირის წოდება მიენიჭა "სამშობლოს დაცვისა და ერთიანობისთვის ბრძოლებში გამოჩენილი მამაცობისა და გამორჩეული გმირობისათვის".