ზუგდიდში გარემოვაჭრეებმა დღეს, 23 იანვარს ე.წ „სვანეთის კოშკთან“ მდებარე ავტოსადგურის გადატანა გააპროტესტეს. მათი თქმით, ისინი პროდუქციის გასაღებას ვერ ახერხებენ, რადგან მათივე განმარტებით, ავტოსადგურის გადატანით მომხმარებელი დაკარგეს. გარემოვაჭრებმა პროტესტის ნიშნად რამდენიმე წუთით საავტომობილო გზაც გადაკეტეს, თუმცა საპატრულო პოლიციის მოთხოვნით მალევე გახსნეს. სვანეთის კოშკთან მდებარე ავტოსადგური, დაახლოებით, ერთი კვირის წინ სავაჭრო ცენტრ „ალიანსის“ გვერდით გადაიტანეს. "ვერ ვყიდით პროდუქტს, ყველაფერი გავიფუჭდა, კიტრი პომიდორი... სესხი გვაქვს აღებული, რა ვქნათ უკიდურეს მდგომარეობაში ავღმოვჩნდით", - აცხადებენ გარემოვაჭრეები რადიო "ათინათთან" საუბარში. თავის მხრივ, სავაჭრო ცენტრ "ალიანსის" დამფუძნებელი ვახტანგ აკობია ამბობს, რომ ავტოსადგურის დაბრუნება ძველ ადგილზე კანონიერ გზებით მოხდა. "ეს ავტოსადგური და მარშუტკები ჩვენი იყო. მძღოლები პირადად მე მოვიყვანე.  2003-2004 წლებში ეს მარშუტკები თვითნებურად გადაიყვანეს სვანეთის კოშკთან მდებარე ტერიტორიაზე. ეს მარშუტკები იყო ჩვენი და გადმოვიყვანეთ ისევ აქეთ",- ამბობს ვახტანგ აკობია. აქციის მონაწილეებმა ადგილობრივ ხელისუფლების წარმომადგენლებთან შეხვედრა სცადეს, თუმცა უშედეგოდ. გარემოვაჭრეების თქმით, ისინი გუბერნიისა და გამგეობის წარმომადგენლებთან შეხვედრას უახლოეს დღეებში კვლავ შეეცდებიან.