რეგიონული განვითარებისა და ინფრასტრუქტურის სამინისტრო და შრომის, ჯანმრთელობისა და სოციალური დაცვის სამინისტროს ინიციატივით ზუგდიდისა და წალენჯიხის მუნიციპალიტეტის სოფლებში ახალი ამბულატორიები გაიხსნა. ამობულატორიები შესაბამისი ინვენტარით უკვე აღჭურვილია და ფუნქციონირებას მალე დაიწყებს. როგორც ზუგდიდის მუნიციპალიტეტის სოფელ განმუხურის თემის რწმუნებულმა ჯონი მიშველიამ რადიო „ათინათთან“  საუბარში აღნიშნა,  განმუხურში ამბულატორია ყოფილი ბიბლიოთეკის შენობაში იყო განთავსებული და არ იყო შესაბამისი პირობები, ახალი კი შენობა  აღჭურვილია ყველა საჭირო ინვენტარით. განმუხურის ამბულატორიით, როგორც ადგილობრივი ასევე მიმდებარე სოფლების და დევნილი მოსახლეობაც ისარგებლებს. ახალი ამბულატორიით სარგებლობას უახლოეს მომავალში წალენჯიხის მუნიციპალიტეტის სოფელ საჩინოს მოსახლეობაც შეძლებს. თემის რწმუნებულმა ანზორ შეროზიამ რადიო „ათინათთან“ საუბარში განმარტა, რომ ახლი ამბოლატორია 2400 მოსახლეს მოემსახურება. შეგახსენებთ, რომ საქართველოს მთავრობის გადაწყვეტილებით, რეგიონული განვითარებისა და ინფრასტრუქტურის სამინისტრო და შრომის, ჯანმრთელობისა და სოციალური დაცვის სამინისტრო ერთობლივად ახორციელებს 81 ახალი ამბულატორიის მშენებლობის პროექტს. ამჟამად ამბულატორიები სამეგრელო-ზემო სვანეთის რეგიონის მუნიციპალიტეტების გარდა, დამონტაჟებულია ბოლნისის მუნიციპალიტეტის სოფელ რანჩპარში, ოზურგეთის მუნიციპალიტეტის სოფელ დვაბზუში, და გურჯაანის მუნიციპალიტეტის სოფელ მუკუზანში.