კონკურსი სახელწოდებით, „ქართული კალიგრაფია“ დღეს დასრულდა. კონკურსი სამი ეტაპისგან შედგებოდა და ის ზუგდიდისა და ცაიშის ეპარქიის სულიერებისა და კულტურის ცენტრის, ზუგდიდის მუნუციპალიტეტის ცენტრალურ ბიბლიოთეკის ორგანიზებით ჩატარდა. კონკურსში მონაწილეობა 100-მდე მოზარდმა მიიღო, გამარჯვებულებს სიმბოლური საჩუქრები გადაეცათ. როგორც მედიასთან საუბარში ხელნაწერთა ეროვნული ცენტრის წარმომადგენელმა ნიკოლოზ ჟღენტმა განმარტა, - „ხელნაწერთა ეროვნულმა ცენტრმა 2014 წელს მეორედ ჩაატარა აღნიშნული კონკურსი ქართულ კალიგრაფიაზე. კონკურსში მონაწილეობის მიღება ეთნიკურ უმცირესობას და საზღვარგარეთ მცხოვრებ ქართველებსაც შეეძლოთ“. ცენტრალური ბიბლიოთეკის ავტომატიზაციის განყოფილების გამგეს ირმა კვირკვიას თქმით, - „კონკურსი „ქართულ კალიგრაფიაზე“ უკვე მეორე წელია ტარდება და წლევანდელ კონკურსში მუნიციპალიტეტის მასშტაბით ყველა სკოლამ და მსურველმა მიიღო მონაწილეობა. აღსანიშნავია ის ფაქტი რომ ერთ-ერთი მონაწილე 72 წლის გახლდათ“. ორგანიზატორების განცხადებით, იმისთვის რომ შენარჩუნდეს ქართული ანბანი და კალიგრაფია აუცილებელია მზგავსი ტიპის ღონისძიებების ჩატარება და მომავალი წლისთვის კონკურსი უფრო ფართო მასშტაბიანი გახდება.