დღეს, ზუგდიდში კორეული კომპანიების  „SEOL&COMPANY“-ის და „ADEPT CONSULTING“-ის წარმომადგენლები იმყოფებოდნენ. მათ  ადგილობრივი ხელიუფლების წარმომადგენლებთან ერთად  შალვა დადიანის სახელობის სახელმწიფო დრამატული თეატრი და ბოტანიკური ბაღის ტერიტორია დაათვალიერეს. კორეული კომპანიის წარმომადგენლები ზუგდიდში  სამეგრელო-ზემო სვანეთის  გუბერნატორის, ლევან შონიას მოწვევით იმყოფებიან. ამის შესახებ ინფორმაციას ზუგდიდის მერია ავრცელებს. მათივე განმარტებით, კომპანია  „SEOL&COMPANY” -სთან  ამ ეტაპზე სარეაბილიტაციო სამუშაოების განსახორციელებლად აქტიური მოლაპარაკებები მიმდინარეობს. ამ პროექტებთან დაკავშირებით კორეული კომპანიის ეს შემადგენლობა ზუგდიდში რამდენიმე თვის წინაც იმყოფებოდა. დღეს კი, მათ დეტალურად შეისწავლეს სარეაბილიტაციო ობიექტების მდგომარეობა. მოლაპარაკების სტადიაშია ასევე ახალი სპორტული კომპლექსის მშენებლობა ზუგდიდში. აღნიშნული პროექტების პარალელურად, საქართველოს კულტურული მემკვიდრეობის დაცვის ეროვნული სააგენტოს დაფინანსებით მიმდინარეობს დადიანების სასახლის კომპლექსში ეკატერინეს სასახლის კვლევითი სამუშაოები. ამერიკის საელჩოს დაფინანსებით კი საპროექტო დოკუმენტაციას ქართული ხელოვნების საერთაშორისო ცენტრი ამზადებს. ასევე, მიმდინარეობს ნიკოს სასახლის რეაბილიტაციის საპროექტო დოკუმენტაციის მომზადება, რომლის საფუძველზეც 2015 წელს დაგეგმილია სარეაბილიტაციო სამუშაოების განხორციელება.