გამოცემა ‘Sunday Times’–მა წელსაც არ უღალატა ტრადიციას და დიდ ბრიტანეთსა და ირლანდიაში მოღვაწე 50 მილიონერი მუსიკოსის სია გამოაქვეყნა.

სიაში მესამე პოზიცია The Beatles-ის ყოფილმა წევრმა და ლეგენდარულმა მუსიკოსმა პოლ მაკარტნიმ დაიკავა 665 მილიონი ფუნტი სტერლინგით. მომღერალმა მხოლოდ გასულ წელს საკუთარი შემოსავლები 170 მილიონიოთ გაზარდა. მას ერთი ადგილით უსწრებს თეატრალური პროდიუსერი კამერონ მაკინტოში, ხოლო პირველი ადგილი კი ხმის ჩამწერი კომპანიების მფლობელმა კლაივ კალდერმა დაიკავა 1,350 მილიონი ფუნტი სტერლინგით.

მე–4 ადგილი კომპოზიტორმა და თეატრის იმპრესარიომ ენდრიუ ლოიდ ვებერმა დაიკავა, მას კი 514 მილიონი ფუნტი სტერლინგით ჯგუფი U2 მოჰყვება. ათეულში ასევე მოხვდნენ მიკ ჯაგერი და დანიელ ეკი. სიაში ასევე მოხვდნენ Coldplay-ის ფრონტმენი კრის მარტინი და მისი მეუღლე გვინეტ პელტროუ და Take That-ის გარი ბარლოუ.

სიის შედგენისას მხოლოდ იდენტიფიცირებადი სიმდიდრე – უძრავი ქონება, სხვადასხვა სახის აქტივები, როგორებიცაა ხელოვნების ნიმუშები ან ცხენები და სხვადასხვა კომპანიაში არსებული წილები გაითვალისწინეს. გამოცემას ხელი არ მიუწვდებოდა საბანკო ანგარიშებზე, რომლებიც თავად ამ ადამიანების ნება–სურვილით არის გასაიდუმლოებული.