ამერიკელი მსახიობი მერილ სტრიპი ნიუ-იორკში სცენარისტი ქალებისთვის სტუდიას აარსებს. კომპანიას, რომელშიც 40 წელს გადაცილებული ქალები იმუშავებენ New York Women in Film and Television- ერქმევა. ამის შესახებ კვირას, Tribeca Film Festival-ის ფარგლებში გამართულ ღონისძიებაზე გახდა ცნობილი. სტუდიის მიზანია თავი მოუყაროს ნიჭიერ ქალებს. პირველი მაისიდან პირველ ივნისამდე სტუდია განიხილავს კანდიდატების სიას და მათგან რვა სცენარისტს აარჩევს სათანამშრომლოდ. ახალბედა სცენარისტებს პირველი წლის განმავლობაში მენტორების ჯგუფი დაეხმარება. ხელმძღვანელების ჯგუფში შედიან "Beyond the Lights"-ის მწერალი და რეჟისორი ჯინა პრინც-ბისვუდი, "Boyhood"-ის პროდიუსერი ქეროლაინ კაპლანი და "Legally Blonde"-ს და “Bring It On”-ის მწერლები: კირსტენ სმიტი და ჯესიკა ბენდინჯერი. სტუდია ნიუ-იორკის შტატის ჩრდილოეთ ნაწილში განთავსდება.