საქართველოს საგარეო საქმეთა მინისტრი მაია ფანჯიკიძე ადასტურებს, რომ დიდ ბრიტანეთში საქართველოს ელჩად მწერალ ზურაბ ქარუმიძის კანდიდატურა განიხილება. როგორც ჟურნალისტებს მაია ფანჯიკიძემ განუცხადა, ეს არის სამუშაო პროცესი და საბოლოო გადაწყვეტილება მიღებული არ არის. "ჩვენ ბატონი ზურაბის კანდიდატურას, რომელსაც მე ძალიან დიდ პატივს ვცემ და ძალიან ვაფასებ, განვიხილავთ, მაგრამ ეს გადაწყვეტილება მიღებული არ არის და მისი არანაირი წარდგინება არსად გადაგზავნილი არ არის", - აღნიშნა მინისტრმა. მისივე თქმით, ეს არის სამუშაო პროცესი, რომლის დამთავრებამდე საუბარი, არა მხოლოდ საქართველოს ინტერესებიდან გამომდინარე, არამედ ორმხრივი ინტერესებიდან გამომდინარეც არ არის მიზანშეწონილი. "სხვათა შორის ელჩის კანდიდატურები პარლამენტს აღარ ეგზავნება. ელჩის კანდიდატურა საქართველოს საგარეო საქმეთა მინისტრის მიერ ეგზავნება საქართველოს მთავრობას, გადის მთავრობაზე და მის დანიშვნას შემდეგ ხელს აწერს პრეზიდენტი. ეს კი ამ შემთხვევაში ჯერ არ მომხდარა. ასე რომ, ეს აჟიოტაჟი არაჯანსაღია", - განაცხადა მაია ფანჯიკიძემ. პრესაში ზურა ქარუმიძის შესახებ დეპუტატ სოსო ჯაჭვლიანთან ინტერვიუ გამოქვეყნდა, სადაც უმრავლესობის წევრი ელჩად მის შესაძლო დანიშვნას აპროტესტებს. სოსო ჯაჭვლიანის განცხადებამ საზოგადოების ნაწილის უკმაყოფილებაც გამოიწვია. როგორც ისინი აცხადებენ, სოსო ჯაჭვლიანის შიშით პარლამენტი ძალიან კარგი ქართველი მწერლის, ზურაბ ქარუმიძის მარგინალიზაციას ახდენს.