საქართველოს პრეზიდენტმა ადგილობრივი თვითმმართველობის არჩევნების დანიშვნის შესახებ განკარგულება გამოსცა. შესაბამისი ნორმატიული აქტი თანხმობის მისაღებად ხვალ მთავრობის სხდომაზე გადის. "პრეზიდენტმა გამოსცა განკარგულება, მაგრამ არჩევნები დანიშნული არაა, სანამ მთავრობის მიერ კონტრასიგნაცია არ მოხდება. მთავრობა აღნიშნულ საკითხს ხვალინდელ სხდომაზე განიხილავს"-აცხადებს მთავრობის საპარლამენტო მდივანი შალვა თადუმაძე,რომელიც აღნიშნულ საკითხზე მომხსენებელია. საქართველოს მთავრობის განკარგულების პროექტი "ადგილობრივი თვითმმართველობის ორგანოების არჩევნების დანიშვნის შესახებ" საქართველოს პრეზიდენტის განკარგულების მოწონების თაობაზე" მთავრობის ხვალინდელი სხდომის დღის წესრიგში პირველ საკითხად არის შეტანილი. მომხსენებელი კი სწორედ შალვა თადუმაძეა. საარჩევნო კოდექსის თანახმად, ადგილობრივი თვითმმართველობის წარმომადგენლობითი ორგანოს – საკრებულოს, თვითმმართველი ქალაქის მერის და თვითმმართველი თემის გამგებლის მორიგ არჩევნებს ნიშნავს საქართველოს პრეზიდენტი საქართველოს პრემიერ-მინისტრის კონტრასიგნაციით. როგორც პრეზიდენტის ადმინისტრაციაში აცხადებენ,გიორგი მარგველაშვილმა არჩევნების თარიღად პარლამენტში პრეზიდენტის მოხსენებით გამოსვლისას გაჟღერებული თარიღი -15 ივნისი განსაზღვრა და ამ მხრივ არაფერი შეცვლილა.