პარლამენტმა,ცნობად მიიღო სახელმწიფო საიდუმლოებაზე, მათ შორის საიდუმლო სამხედრო შესყიდვებზე, წვდომის მქონე ნდობის ჯგუფის ხუთი დეპუტატით დაკომპლექტების საკითხი. ნდობის ჯგუფში შევიდნენ თავდაცვისა და უშიშროების საპარლამენტო კომიტეტის თავმჯდომარე ირაკლი სესიაშვილი ქართული ოცნებიდან, საპარლამენტო უმრავლესობის კვოტით მისი ლიდერი დავით საგანელიძე, მაჟორიტარების კვოტით პარლამენტი ვიცე-სპიკერი ქართული ოცნებიდან ზვიად ძიძიგური, ნაციონალური მოძრაობიდან დეპუტატი გივი თარგამაძე, უმრავლესობისა და უმცირესობის გარეთ დარჩენილი დეპუტაციიდან ფრაქცია „უპარტიო, დამოუკიდებელი მაჟორიტარების“ თავმჯდომარე კახაბერ ოქრიაშვილი. ნდობის ჯგუფის შექმნა ამ მოწვევის პარლამენტმა ფუნქციონირების დაწყებიდან წელიწად ნახევრის თავზე მხოლოდ მას შემდეგ შეძლო, რაც ამ ჯგუფის ჩამოყალიბების საკანონმდებლო წესები შეცვალა. თებერვალში მიღებული ახალი რეგულაციების თანახმად, ნდობის ჯგუფის წევრები კენჭისყრით აღარ ირჩევიან და პარლამენტი ჯგუფის შემადგენლობას "ცნობად იღებს" მას შემდეგ, რაც კანდიდატები სპეციალურ შემოწმებას გაივლიან სახელმწიფო საიდუმლოებასთან დაშვების მისაღებად. ერთ-ერთი ძირითადი წინააღმდეგობა, რის გამოც ნდობის ჯგუფი ძველი წესით ვერ შეიქმნა, უკავშირდებოდა ნაციონალური მოძრაობის დეპუტატს გივი თარგამაძეს, რომლის არჩევასაც საპარლამენტო უმრავლესობა ეწინააღმდეგებოდა.