შერიგებისა და სამოქალაქო თანასწორობის საკითხებში სახელმწიფო მინისტრის, პაატა ზაქარეიშვილის განცხადებით, აფხაზეთში ახლა ძალაუფლებისათვის ბრძოლა მიმდინარეობს. ამის შესახებ პაატა ზაქარეიშვილმა RTVI მიცემულ ინტერვიუში განაცხადა. ,,ის ადამიანები, რომლებიც აფხაზეთში მოთხოვნებს აყენებენ, აცხადებენ, რომ აფხაზეთის ტერიტორიაზე მცხოვრებ გარკვეულ ეთნიკურ ჯგუფებზე ზეწოლა უნდა განახორციელონ. ვფიქრობ, რომ 21–ე საუკუნეში ასეთი ღირებულებებით მანიპულირება კარგ შედეგებამდე არ მივა. განსაკუთრებით მაშინ, როცა საქართველოს მთავრობამ, ბოლო პერიოდის განმავლობაში მკაფიოდ შეცვალა საკუთარი პოლიტიკა და დამოკიდებულება ქართულ –აფხაზურ ურთიერთობებში. მაშინ, როდესაც ჩვენ აფხაზებს დიალოგს და ყველა საკითხის განხილვას ვთავაზობთ, რომლის საშუალებაც მათ წინა მთავრობის დროს არ მიეცათ. იმ ფონზე, როდესაც გამყოფ ხაზზე მოხსნილია ყველანაირი დაძაბულობა, არ იკარგებიან ადამიანები და არ არსებობს რაიმე ეჭვი ტერორისტული აქტებისა, ეს კი ახალი ხელისუფლების პირობებში ხდება – ზუსტად 2012 წლის შემდეგ და არა მანამდე. ამ ფონზე, გალის რაიონში მცხოვრებ მოქალაქეებზე ზეწოლა არაადეკვატურია და არ შეესაბმება შერიგებისა და კონფლიქტის მოგვარების განწყობას,“ – აცხადებს პაატა ზაქარეიშვილი. მისივე თქმით, მოსკოვი აფხაზეთში საკუთარ წესებს ადგენს. ,,აფხაზეთში ახლა ძალაუფლებისთვის ბრძოლა მიდის. იქ პოლიტიკური ელიტა ჰომოგენურია. ამ ბრძოლებში ადგილობრივი მოსახლეობა არ უნდა იყოს ჩართული. იმედი გვაქვს, რომ იქ ვითარება დარეგულირდება და მოსახლეობას მინიმუმ, მიეცემა ისეთი ცხოვრების საშუალება, როგორც აქამდე იყო. მოსკოვი აფხაზეთში საკუთარ წესებს ადგენს. საქართველოს ტერიტორია ოკუპირებულია. აფხაზეთი ჩვენ რუსეთის შუამავლობით გვეკონტაქტება,“– აღნიშნავს ზაქარეიშვილი.