აფხაზეთში განვითარებული მოვლენებიდან ნათლად ჩანს, რომ ეს არის რუსეთის პირდაპირი და ღია ჩარევა ჩვენი ქვეყნის ტერიტორიისა და ჩვენი მოქალაქეების ცხოვრებაში , - ამის შესახებ საქართველოს პრეზიდენტმა, გიორგი მარგველაშვილმა პრეზიდენტის სასახლეში, შვეიცარიელ კოლეგასთან ერთობლივ პრესკონფერენციაზე განაცხადა. ამასთან, მარგველაშვილი არ ფიქრობს, რომ ამ ფორმით იქნება მცდელობა საქართველოს დასჯის ასოცირების ხელშეკრულებაზე ხელმოწერისთვის. "ის, რაც აფხაზეთში ხდება ჩვენ ამას ვაკვირდებით უაღრესი ყურადღებით, რადგან ეს არა მხოლოდ ოკუპირებული ტერიტორიაა, არამედ იქ ცხოვრობენ ჩვენი მოქალაქეები, ყველა ეთნიკური წარმოშობის საქართველოს მოქალაქეები. მათი ინტერესების დაცვას ჩვენ ვართ მოკლებული ხელოვნურად. ამიტომაც, ჩვენ ყურადღებით ვაკვირდებით როგორ ვითარდება იქ სიტუაცია. ნათლად ჩანს, რომ ეს არის რუსეთის პირდაპირი და ღია ჩარევა ჩვენი ქვეყნის ტერიტორიისა და ჩვენი მოქალაქეების ცხოვრებაში. ჩვენ იმედი გვაქვს, რომ ეს არანაირად არ დაუკავშირდება ასოცირების ხელშეკრულებას და არ იქნება საშუალება, რომლითაც თითქოს გვპასუხობენ დამოუკიდებელ, სუვერენულ სახელმწიფოს, რომლის პოლიტიკური სპექტრიც გაერთიანებულია იმისთვის, რომ მოაწეროს ხელი ასოცირების ხელშეკრულებას და ეს არჩევანი არის ნათლად გამოხატული. მე არ ვფიქრობ, რომ ამ ფორმით იქნება მცდელობა ამ არჩევანისთვის დასჯის", - აღნიშნა მარგველაშვილმა. მისივე თქმით, სწორედ ამიტომ, რა მოვლენებიც ვითარდება, სასარგებლო იქნება ეუთო-ს მონიტორინგის მისია. "სწორედ ამიტომ, ჩემს კოლეგასთან ვისაუბრე ეუთოს მონიტორინგის მისიაზე, როემლიც საინტერესო და სასარგებლო იქნება, რომ განხორციელდეს განსაკუთრებით ამ რთულ ვითარებაში. ნებისმიერ შემთხვევაში, ჩვენ ვგმობთ ასეთი ტიპის ჩარევას", - აღნიშნა მარგველაშვილმა. მისივე თქმით, საქართველოს არჩეული გზიდან ვერავინ გადაიყვანს. "ქართული საზოგადოება, ქართული პოლიტიკური სპექტრი, აბსოლუტურად გაერთიანებულია იმ გზაზე, რომელზეც ჩვენ მივდივართ, იმ გზაზე, სადაც გვექნება ახალი პოლიტიკური ეტაპი, რომელიც არის ასოცირების ხელშეკრულების ხელმოწერა. ეს ეტაპი გაგრძელდება. ასოცირების ხელშეკრულების ხელმოწერიდან საქართველო იწყებს მუშაობას და მოძრაობას ევროკავშირის წევრობაზე. ეს გზა არჩეულია და ამ გზიდან ჩვენ ვერავინ გადაგვიყვანს", - აღნიშნა საქართველოს პრეზიდენტმა.