კორუფციასა და სამსახურებრივი უფლებამოსილების გადამეტებაში ეჭვმიტანილი საფრანგეთის ექსპრეზიდენტი ნიკოლა სარკოზი მის მიმართ წაყენებულ ბრალდებას უარყოფს და აცხადებს, რომ მასზე პოლიტიკური მიზნით ზეწოლა ხორციელდება. ამის შესახებ საფრანგეთის ექს-პრეზდენტმა ტელეარხ TF1-ს განუცხადა და დასძინა, რომ უკანონო არაფერი ჩაუდენია. "მახინჯი" საქმე, რომელიც პოლიტიკოსის წინააღმდეგ აღიძრა, სარკოზის თქმით, მისი რეპუტაციის შებღალვას ისახავს მიზნად. მიუხედავად ყველაფრისა,სარკოზი იმედოვნებს, რომ 2017 წელს დაგეგმილ არჩევნებში მიიღებს მონაწილეობას. ექსპერტები თვლიან, რომ სარკოზის წინააღმდეგ მიმართული ბრალდებები სერიოზული დაბრკოლება იქნება მისი საპრეზიდენტო ამბიციების განსახორციელებლად. ნიკოლა სარკოზი 1 ივლისს ჩავიდა პარიზის დასავლეთით მდებარე ნანტერში გამომძიებლების შეკითხვებზე საპასუხოდ მას შემდეგ, რაც 30 ივნისს დასაკითხად დააკავეს მისი ადვოკატი და ორი მოსამართლე. პროკურატურა ცდილობს დაადგინოს, აქვს თუ არა სარკოზის კავშირი მოსამართლის მოსყიდვასთან, მისგან დახურული ინფორმაციის მოსაპოვებლად. ბრალდებები უკავშირდება სარკოზის საარჩევნო კამპანიის სავარაუდო, უკანონო დაფინანსებას.