ჰოლანდიის ქალაქ ჰილვერსუმის მერმა, პიტერ ბრურტიემ ჰოლანდიურ რადიოსადგურ Radio 1-თან ინტერვიუში განაცხადა, რომ მოუწოდებს ხელისუფლებას, ქვეყნიდან გააძევონ პუტინის ქალიშვილი, რომელიც , სავარაუდოდ, ვორსხოტენში ცხოვრობს. ასეთი სიტყვების მიზეზად უკრაინაში მალაიზიის ბოინგის კატასტროფა იქცა, რომელიც უკრაინის ხელისუფლებისა და დასავლეთის ქვეყნების აზრით, დონეცკის თვითგამოცხადებული რესპუბლიკის მიერ კონტროლირებადი ტერიტორიიდან სეპარატისტების მიერ ნასროლმა რაკეტამ ჩამოაგდო. დასავლეთის აზრით, მხარდაჭერამ, რომელსაც მოსკოვი სეპრატისტებს უწევს, მნიშვნელოვანი როლი ითამაშა ლაინერთან დაკავშირებულ ტრაგედიაში. ლაინერის მგზავრთა ნახევარზე მეტი ჰოლანდიელები იყვნენ. მოგვიანებით, ბრურტიემ საკუთარ მიკრობლოგში Twitter -ზე ბოდიში მოიხადა თავისი სიტყვებისათვის. " ჩემი მხრიდან არ იყო გონიერი საქციელი რადიო Radio 1-ის ეთერში მსგავსი განცხადების გაკეთება. ეს იყო საკუთარი უძლურების გამოხატულება, რასაც ახლა ბევრი განიცდის.“