მულტიმედია
რატომ იმატებს კოვიდის შემთხვევები სამეგრელოში (ფოტო/ვიდეო)
სამეგრელო-ზემო სვანეთში, განსაკუთრებით კი ზუგდიდში, კორონავირუსით ინფიცირების მაჩვენებელმა საგრძნობლად იმატა. რეგიონის მასშტაბით, უკვე 2 500-ზე მეტი აქტიური შემთხვევაა. ზუგდიდში, 13 ოქტომბრის მონაცემებით, გამოვლინდა კოვიდის 796 შემთხვევა, აქედან 536 ბოლო კვირაში. დაავადებათა კონტროლის ცენტრის ინფორმაციით, სამეგრელოში გასულ თვეში კორონავირუსით ინფიცირებული 84  ადამიანი გარდაიცვალა, ოქტომბერში - 11.

ინფიცირების შემთხვევების მატების მიუხედავად, მოქალაქეების უმრავლესობა ქვეყანაში დაწესებულ რეგულაციებს არ ითვალისწინებს. ზუგდიდის ქუჩებსა და თუ დაწესებულებებში ხშირად ნახავთ ადამიანებს, რომლებსაც პირბადე არასწორად ან საერთოდ არ უკეთიათ. შედარებით მცირე ნაწილი რეგულაციებს საგულდაგულოდ იცავს და ვაქცინაციის აუცილებლობაშიც დარწმუნებულია.
შალვა, 25 წლის: "შემთხვევებმა იმიტომ იმატა, რომ ბოლო პერიოდში ხალხის უმრავლესობამ, ასე რომ ვთქვათ, "აიგდო" არსებული ვითარება. ყველას მოვუწოდებ, აიცრას, მე ორჯერ ვარ აცრილი. თუ მოხდება ასე და აიცრება უმრავლესობა - ეს მოცემულობა არ გვექნება. მთავარი პრობლემაა დისტანციის არდაცვა, ხვევნა-კოცნა, ჩვენი ტრადიციებიდან გამომდინარე".

მანანა ქარჩავა, პენსიონერი: "ალბათ არ არის რეგულაციები დაცული, მე კი ვარ აცრილი 2-ჯერ მაგრამ ხალხს კი ხედავთ, ზოგიერთს არ უკეთია პირბადე, არაა დაცული წესები. სულ ვიცავ, პირბადეს ვიკეთებ, ვიბან ხელებს, დისტანციას ვიცავ".

ანი, 15 წლის: "ვიცავ შეძლებისდაგვარად რეგულაციებს, ვატარებ პირბადეს, მაგრამ სკოლაში რომ დავდივარ, ცოტა რთულია დისტანციის დაცვა კლასელებთან. არ არის მარტივი, მაგრამ თავი რომ დავიცვა, გარშემომყოფები და ოჯახის წევრებიც, ვცდილობ ყველასთან დისტანცია დავიჭირო. ჯერ არ ვარ იმ ასაკის, რომ გავიკეთო ვაქცინა, თუმცა თუ ჩემი ასაკობრივი კატეგორიისთვის ეს იქნება მისაღები და დამტკიცდება, არ ვარ წინააღმდეგი, რომ ავიცრა - დავიცვა სხვა ადამიანები და საკუთარი თავიც. ჩვენს სკოლაში ამ ეტაპზე მშვიდი სიტუაციაა, არ ფიქსირდება კოვიდის შემთხვევები". 

ბადრი, 54 წლის: "ხალხმრავლობა არის პირველი პრობლემა. უნდა დაიცვა დისტანცია, პირბადე გაიკეთო - ამ გზით შეიძლება გადავრჩეთ. ერთი საათის წინ გავიკეთე მეორე აცრა, ჩინური, "სინოვაკი", თავს კარგად ვგრძნობ. სახლში დედაჩემს, ოჯახის წევრებს ჰქონდათ კოვიდი, მადლობა ღმერთს, გადაიტანეს".


ეპიდემიოლოგები თვის ბოლომდე რიცხვების გაორმაგებას ელოდებიან და ამბობენ, რომ სიტუაციის გაუარესება რეგულაციების უგულებელყოფამ გამოიწვია.

"სექტემბრის მონაცემი გაორმაგდება, გასამმაგდება ოქტომბერში. უკვე აღვრიცხეთ 3000-ზე მეტი შემთხვევა. ყველაზე მეტი ზუგდიდშია, მერე მარტვილში, ფოთში და ასე. გამოიწვია იმან, რომ რეგულაციებს არ იცავენ, არ ატარებენ პირბადეს, არ იცავენ დისტანციას. შეკრებები და  ქელეხები გრძელდება... ასევე, რაც ყველაზე მნიშვნელოვანია - არ იკეთებენ ვაქცინას. თქვენც ხომ ხედავთ ქალაქში რომ გადიხართ, ზოგს როგორ და რანაირად უკეთია. ეს არის ძირითადი მიზეზები... ყველგან იგივეა ძირითადი მიზეზები, რამაც გამოიწვია მატება", - გვეუბნება დაავადებათა კონტროლის ეროვნული ცენტრის წარმომადგენელი სამეგრელო-ზემო სვანეთში, ანზორ ქობალია.

ის შიშობს, რომ ოქტომბერ-ნოემბერში სეზონური გრიპის გავრცელება მდგომარეობას კიდევ უფრო დაამძიმებს და შესაძლოა, რეგიონი თვინდემიის საშიშროების წინაშე დადგეს. ანზორ ქობალია მოქალაქეებს სეზონური გრიპის უფასო ვაქცინაციით სარგებლობისკენ მოუწოდებს.

"სეზონური და კოვიდი თუ დაემთხვევა, გაცილებით ცუდ სიტუაციაში ვიქნებით. გუშინ შემოვიტანეთ სეზონური გრიპის ვაქცინები, ჯერ რისკ-ჯგუფები აიცრებიან, შემდეგ კი სხვები. ვაქცინაცია უფასოა", - გვიხსნის ის.

NCDC-ის წარმომადგენელი წუხს, რომ სამეგრელოსა და ზემო სვანეთში, ისევე როგორც მთელ ქვეყანაში, იკლო კოვიდ საწინაღმდეგო ვაქცინაციის ტემპმა. მისი მონაცემებით, სულ რეგიონში 118 748 აცრაა ჩატარდა, აქედან 63 990 ადამიანი - პირველადად, 54 758 კი სრულადაა ვაქცინირებული.

"დღეში საშუალოდ 400-500 პირი იცრება, რაც კატასტროფულად დაბალი მაჩვენებელია. ამ შედეგებით კმაყოფილები არ ვართ, რა თქმა უნდა. დაბალია მოცვა. საშუალება გვაქვს დღეში 3500-3800-მდე ადამიანი ავცრათ და 5 000-მდეც ავიდეთ, გვაქვს ამის რესურსი. მიზეზს თუ მკითხავთ, ვერ გეტყვით - ვისაც უნდოდა აცრა, აიცრა... ახლა გარკვეული პროცენტი ორჭოფობს, აიცრას თუ არა, არის კატეგორია რომელსაც არ სურს. სწორედ იმ შუალედზე არის სამუშაო, მეტი ინფორმაცია მისაწოდებელი, რაშიც დიდია საზოგადოების და მასმედიის როლი", - მიიჩნევს ანზორ ქობალია.

ბოლო მონაცემებით, ვაქცინირებულია სამეგრელო-ზემო სვანეთის ასაცრელი მოსახლეობის 38%. ყველაზე მაღალი მაჩვენებელი ფოთსა (49%) და ზუგდიდში (44%) ფიქსირდება. დაავადებათა კონტროლის რეგიონული წარმომადგენელი მოქალაქეებს რეგულაციების დაცვას სთხოვს და ვაქცინაციის პროცესში ჩართვისკენ მოუწოდებს.

"პირველი და ძალიან მნიშვნელოვანი - გაიკეთეთ პირბადე, დისტანცირება, თავშეყრის ადგილებს აარიდეთ თავი და რა თქმა უნდა ვაქცინაცია. მე ავიცერი - მიუხედავად რთული ოპერაციებისა, რომელიც გადავიტანე, არ მინდოდა ჩემი ოჯახისთვის ინფექციის წყარო ვყოფილიყავი, თუ წესებს არ დავიცავთ, ცუდად წავა ჩვენი საქმე".





Print Email
FaceBook Twitter
რ ე კ ლ ა მ ა
ჩეხეთის რესპუბლიკის კარიტასის ორგანიზებით, ზუგდიდში არსებული სკრინინგ ცენტრის 2 წლიანი საქმიანობის შედეგები შეაჯამეს.
ვაქცინაციისმხარდაჭერის მიზნით, სტუდენტური კამპანია - #ავიცრათერთმანეთისთვის იწყება.
ზუგდიდში, კოსტავას #7-ში სასწავლო ცენტრი "მესიაკონი" გაიხსნა, სადაც მე-6 კლასამდე მოსწავლეებს მიიღებენ. ცენტრის დირექტორის მაია რიგვავას თქმით,
კორონავირუსი
გასული დღე-ღამის განმავლობაში სამეგრელოს კოვიდკლინიკებში კიდევ 4 ადამიანი გარდაიცვალა. სამი მათგანი - 83 წლის სენაკელი მამაკაცი, ხობის მკვიდრი 80 წლის ქალი და 75 წლის მარტვილელი მამაკაცი
აფხაზეთში კორონავირუსით 111 ადამიანი დაინფიცირდა და 2 გარდაიცვალა. ინფორმაციას ოპერატიული შტაბი ავრცელებს. პაციენტები გუდაუთის კლინიკაში და სოხუმში
დაავადებათა კონტროლის ეროვნული ცენტრის სამეგრელო-ზემო სვანეთის განყოფილების ინფორმაციით, სახელმწიფოს მიერ შეძენილი გრიპის საწინააღმდეგო ვაქცინა ზუგდიდში რამდენიმე ლოკაციაზეა ხელმისაწვდომი.
საზოგადოება
გარემოს დაცვისა და სოფლის მეურნეობის სამინისტრომ ადრეულად გარდაცვლილი მეტყევის "სანდრო ურუშაძის პრემია 2021" ხობელ ბუნების დამცველს, სანდრო ნარსიას გადასცა.
საკოორდინაციო საბჭოს გადაწყვეტილებით, საბავშვო ბაღებსა და როგორც საჯარო, ისე კერძო სკოლებში, 4 ოქტომბერს სასწავლო პროცესი საკლასო ოთახებსა და აუდიტორიებში განახლდება,
ქართველმა მოჭადრაკემ, ნონა გაფრინდაშვილმა Netflix-ის უჩივლა, – ამის შესახებ ინფორმაციას „ნიუ იორკ თაიმსი“ ავრცელებს.
ამავე კატეგორიაში
დღის სიახლეები
26 / ნოემბერი 2021
ჩეხეთის რესპუბლიკის კარიტასის ორგანიზებით, ზუგდიდში არსებული სკრინინგ ცენტრის 2 წლიანი საქმიანობის შედეგები შეაჯამეს.
26 / ნოემბერი 2021
ბოლო 24 საათში გამოვლინდა ვირუსით ინფიცირების 4 534 ახალი დადასტურებული შემთხვევა. ვირუსისგან გამოჯანმრთელდა
26 / ნოემბერი 2021
სამოქალაქო აქტივისტმა როსტომ ზარანდიამ, გუბერნიის გვერდით შენობაზე წარწერა - "უონჯღორე(ეფ)" (უსირცხვილო(ები). ქართ.) დატოვა. მას პოლიციამ წარწერის დასრულების უფლება არ მისცა
გემრიელი ისტორიები
მთავარი საინფორმაციო გამოშვება
ჩვენი თვითმმართველობა
არქივი
ამინდი
ზუგდიდი 7 °C
img
სოხუმი 9 °C
img
ფოთი 9 °C
img
მესტია -3 °C
img
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.