დე ფაქტო აფხაზეთში, ერთი წლის განმავლობაში, ნარკოტიკების დოზის გადამეტების 124 შემთხვევა დაფიქსირდა. თუმცა, მედიკოსების განცხადებით, ეს სტატისტიკა რეალურ ციფრზე არ მეტყველებს და ის გაცილებით მაღალია.

ამის შესახებ „სპუტნიკ აბხაზიასთვის“ მიცემულ ინტერვიუში მთავარმა ნარკოლოგმა ირმა ანუამ განაცხადა.

მისი თქმით, გასულ წელს ნარკოტიკული ნივთიერებების 1113 მომხმარებელი დარეგისტრირდა, თუმცა, აფხაზეთში არ ტარდება სოციალური ანონიმური კვლევები, რომლებიც, გაცილებით უფრო ზუსტ სურათს იძლევა.

ანუას განცხადებით, სტაციონარში მკურნალობა 184 ნარკოდამოკიდებულ პირს ჩაუტარდა, დარეგისტირირებულია ნარკოტიკების დოზის გადამეტების 124 შემთხვევა, რომელთაგან ერთი ლეტალურად დასრულდა.

სოხუმის მთავარმა ნარკოლოგმა, მარიხუანას ლეგალიზაციაზეც გამოთქვა საკუთარი მოსაზრება. მისი განმარტებით, მარიხუანას მომხარება არ წარმოადგენს აფხაზეთის კულტურულ ტრადიციას,როგორც მაგალითად, შუას აზიის ზოგიერთ ქვეყანაში. „ვფიქრობ, ღირს დავაკვირდეთ ხანგრძლივი დროის განმავლობაში, რას მოუტანს მსგავსი გამოცდილება იმ ქვეყნებს, სადაც მარიხუანა ლეგალიზებულია. აფხაზეთში მსგავსი ექსპერიმენტის ჩატარება არ შეიძლება, ჩვენი მოსახლეობა, ძალიან მცირერიცხოვანია ასეთი რისკებისთსვის“, - თქვა ანუამ.

ნარკოტრაფიკთან დაკავშირებით დასმულ შესაბამის კითხვაზე პასუხისას მან აღინშნა, რომ დე ფაქტო აფხაზეთში მარიხუანას შემოტანას აზრი არა აქვს, რადგან,"ის ისედაც მოჰყავთ". მისი თქმით, ძირითადად, შემოაქვთ "მეტადონი, დეამორფინი, ლირიკა, ბაკლოსანი, ჰეროინი და კოკაინიც, თუმცა, მცირე მოცულობით“.

მედიკოსის ინფორმაციით, იმ პაციენტების ასაკი, რომლებიც ნარკოლოგიურ ცენტრში რეაბილიტაციის კურს გადიან, 25- დან 60 წლამდეა და ბევრი მათგანი,“ომის პერიოდში გახდა ნარკოდამოკიდებული“.