სოფელ მუჟავაში აფხაზეთის ე.წ. საზღვართან ტაბელური იარაღიდან გასროლის შედეგად გარდაცვლილი ბექა რუსიას დედა დარწმუნებულია, რომ დანაშაული ბრალდებულ დავით ჯალაღონიას არ ჩაუდენია. იზა რუსია მომხდარში ბრალს საგუშაგოს მეთაურის მოადგილეს ალექსანდრე კვიჟინაძეს სდებს.

„მე დარწმუნებული ვარ, რომ ამ ბავშვს ეს არ ჩაუდენია. ვფიქრობ, რომ იყო სტრესის ქვეშ“, - თქვა მან სასამართლო სხდომის შემდეგ.



საქმის არსებითი განხილვა პროკურორის თხოვნის საფუძველზე 26 თებერვლამდე გადაიდო. პროცესზე ბრალდებულმა კიდევ ერთხელ განაცხადა, რომ წარდგენილ ბრალში თავს დამნაშავედ ცნობს.

შესავალ სიტყვის წარმოთქმისას პროკურორმა აღნიშნა, რომ დავით ჯალაღონიამ ალექსანდრე კვიჟინაძის კუთვნილი იარაღით შემთხვევით ესროლა ბექა რუსიას, რის შედეგადაც ის გარდაიცვალა.

თავის მხრივ ადვოკატი ამბობს, რომ ბრალდებული ნანობს ჩადენილს დანაშაულს და განიცდის ამ ფაქტს.

„ის აცნობიერებს, რომ მისი საუკეთესო მეგობარი არის გარდაცვლილი და ვერაფერს შეცვლის“, - აღნიშნა ნინელი ქოაიავამ.

ბრალდებულმა დავით ჯალაღონიამ შესავალი სიტყვის თქმა არ ისურვა.

„რაღა უნდა დავამატო“, - თქვა მან.

სასამართლო პროცესს ბექა რუსიას ოჯახის წევრებთან ერთად დაკავებულის ახლობლები და სახალხო დამცველის წარმომადგენელიც დაესწრო.



რაც შეეხება რუსიას ტელეფონში აღმოჩენილ ფოტო-ვიდეომასალას, პროკურურმა დავით პაპავამ განმარტა, რომ გამოძიებამ სასამართლოს აღნიშნული მასალების საქმისთვის დართვის შუამდგლომლობით უკვე მიმართა.

წალენჯიხის სოფელ მუჟავაში ახალგაზრდა მამაკაცი აფხაზეთის ე.წ. საზღვართან 26 ოქტომბერს გარდაიცვალა.

მომხდარზე საქმე სს კოდექსის 116-ე მუხლით არის აღძრული, რაც გაუფრთხილებლობით სიცოცხლის მოსპობას გულისხმობს. მოგვიანებით, ბექა რუსიას ტელეფონში აღმოჩენილი ფოტო-ვიდეომასალის საფუძველზე გამოძიება სს კოდექსის 333-ე, სამსახურებრივი უფლებამოსილების ძალადობით გადამეტების შესაძლო ფაქტზე დაიწყო. გარდაცვლილის ოჯახს პროკურატურის ვერსიის არ სჯერა. რუსიები საქმის ხელახალ გამოძიებას მოითხოვენ.

ამავე თემაზე:

სასამართლოს ეზოში ბექა რუსიას ოჯახი დაკავებულის ახლობლებს დაუპირისპირდა

გარდაცვლილი რუსიას ოჯახი: არ გვაქვს იმედი, რომ სამართლიან გადაწყვეტილებას მიიღებენ