ზუგდიდის მუნიციპალიტეტის მერიამ, კულტურული მემკვიდრეობის ძეგლთა დაცვის ხელშეწყობის პროგრამის ფარგლებში, ცაცხვში მდებარე კულტურული მემკვიდრეობის ძეგლის ე.წ. „ცაიშის სამაროვანის“ არქეოლოგიური კვლევა-ძიების მომსახურებისთვის ტენდერი გამოაცხადა, შესყიდვის ღირებულება კი 38 728 ლარია.

სატენდერო დოკუმენტაციაში ვკითხულობთ, რომ ტენდერში გამარჯვებულმა კომპანიამ უნდა უზრუნველყოს ცაცხვში, გოგი ნაროუშვილის საკარმიდამო ნაკვეთზე არქეოლოგიურ კვლევა-ძიებასთან დაკავშირებული მიწის სამუშაოები, სამუშაოების წარმოების პროცესში გამოვლენილი კულტურული ფენების პრეპარაცია, შოთა მესხიას ზუგდიდის სახელმწიფო სასწავლო უნივერსიტეტის სტუდენტების პრაქტიკული სწავლება, შესასწავლი ტერიტორიის და მასზე არსებული ობიექტების ფიქსაცია, ფოტო ვიზუალური აღწერის მასალების მომზადება, შესწავლილი ტერიტორიის (ობიექტის) ისტორიულ-ბიბლიოგრაფიული და საარქივო კვლევის მასალების მომზადება წყაროების მითითებით, საკვლევ ტერიტორიაზე მოპოვებული პირველადი ინფორმაციის საარქივო მონაცემებთან მიმართების ანალიზი, შესასწავლი ტერიტორიის სიტუაციური გეგმის და საკვლევი ტერიტორიის კვადრატებად დაყოფის სქემის მომზადება, არქეულოგიური კვლევისას გამოვლენილი ძეგლების განლაგების სქემის და ანაზომის შედგენა, ტექსტური აღწერილობისა და დასკვნების მომზადება.

გარდა ამისა, წარმოდგენილი პრობებისა და ვადების ფარგლებში, ტენდერში გამარჯვებულმა, შემსყიდველს და საქართველოს კულტურული მემკვიდრეობის დაცვის ეროვნულ სააგენტოს უნდა გადასცეს არქეოლოგიური კვლევის ჩატარების შედეგები.




რაც შეეხება სამუშაოების პირობებს, ტენდერის თანახმად, გამარჯვებულმა სხვადასხვა პირობა უნდა შეასრულოს, მათ შორის, მაგალითად, სამუშაოთა მიმდინარეობისას გამოვლენილი არქეოლოგიური ობიექტები და არქეოლოგიური მასალა სათანადოდ უნდა დაიცვას დაზიანებისაგან, განადგურებისა და დაკარგვისაგან. ასევე, გარემო პირობებისა და სხვა არასასურველი ზემოქმედებისაგან, თუ არქეოლოგიურ სამუშაოთა მიმდინარეობისას გამოვლინდა მაღალი მატერიალური ღირებულების მქონე ნივთი (ნივთები). ამასთანავე, მეთოდოლოგიური, კლიმატური, ტექნიკური ან სხვა პირობების გამო ვერ ხერხდება მისი (მათი) დაუყონებლივ ამოღება და უსაფრთხო ადგილას ტრანსპორტირება. ტენდერში გამარჯვებული პრეტენდენტი ვალდებულია, დაუყონებლივ მიმართოს შინაგან საქმეთა სამინისტროს შესაბამის ტერიტორიულ ორგანოს, მოძრავი არქეოლოგიური მონაპოვარი, უნდა ჩაბარდეს უახლოეს მუზეუმ-ნაკრძალს, მუზეუმს ან სხვა შესაბამის სამეცნიერო დაწესებულებას სათანადო თანმხლებ დოკუმენტაციასთან ერთად, საველე-კვლევით არქეოლოგიურ გათხრებში პრაქტიკულ-შემეცნებითი სემინარები ჩაუტარდეს შოთა მესხიას ზუგდიდის სახელმწიფო სასწავლო უნივერსიტეტის ისტორიის სპეციალობის სტუდენტებს.

აქვე მოცემულია „ცაიშის სამაროვანის“ მოკლე აღწერაც.

„სამაროვანი ცნობილი გახდა 2001 წელს, ადგილობრივი მცხოვრების, მოქალაქე მედეა ჭითანავას ინფორმაციის შემდეგ. 2001-2003 წწ. კოლხეთის არქეოლოგიურმა ექსპედიციამ (ხელმძღვ. რ. პაპუაშვილი) ამ ინფორმაციის საფუძველზე ცაიშის შემოგარენში ჩაატარა დაზვერვები. დაფიქსირდა ბრინჯაოს, ადრერკინისა და ანტიკური ხანის არტეფაქტები. სამაროვანი დაფერდებულ ადგილზე მდებარეობს და გვერდით პატარა უსახელო ღელე ჩამოუდის, ნიადაგი 0,4 - 0,5 მ სიღრმემდე კირქვიანია, რომელსაც თიხნარი ფენა მოსდევს. სამაროვანი აშკარად მრავალფენიანია და დიდ ფართობსაც მოიცავს, რაზედაც მეტყველებს სხვადასხვა ნაკვეთებში აღმოჩენილი ცალკეული არტეფაქტები. ცაიშის სამაროვანზე ჯერ-ჯერობით ორი კოლექტიური სამარხი-ორმოა შესწავლილი“, - ვკითხულობთ სატენდერო დოკუმენტაციაში.

ტენდერში წინადადებების მიღება 23-დან 25 მაისის ჩათვლით გაგრძელდება.