ზუგდიდში მიმდინარე აქციის მონაწილეებმა, სახელმწიფო რწმუნებულის ადმინისტრაციისკენ გადაინაცვლეს. უფრო ადრე, ისინი მერიის შენობასთან შეიკრიბნენ.
ისევე, როგორ წინა დღეებში, აქციაზე მიიტანეს, საქართველოს და ევროკავშირის დროშები.

აქ მოსული სხვდასხვა თაობის ადამიანების მთავარი მოთხოვნაა ხელახალი სამართლიანი არჩევნების ჩატარება და რეჟიმის პატიმრების გათავისუფლება.

„დღეს ჩემი პროტესტის მიზანი არის ის, რომ დავიბრუნო წართმეული არჩევანი, რომელიც მე გავაკეთე და გაყალბდა. აქედან გამომდინარე, ვაპროტესტებ საგარეო კურსის შეცვლას, კონსტიტუციის შეცვლას, ვითხოვს იმას, რომ ჩვენი დაჭერილი ახალგაზრდობა გამოუშვან. მინდა, რომ არჩევნები ხელახლა ჩატარდეს. საქართველოს მომავალი აუცილებლად უნდა იყოს ევროპაში, ჩვენ ის რუსული რეჟიმი გავიარეთ 93-ში, სამჯერ დევნილი ვარ, კარგად ვიცი, რუსეთი რას ნიშნავს და უკან დაბრუნება არ გვინდა. საჭიროა, ჩვენმა ქვეყანამ მიიღოს ის, რაც ეკუთვნის ევროპის ხაზით, ევროპასთან ერთად უნდა იცხოვროს ჩვენმა ახალგაზრდობამ“, - ამბობს ერთ - ერთი მათგანი, აფხაზეთიდან დევნილი, ნონა ბუკია.

ბოლო რამდენიმე დღეა, ქალაქის ცენტრში, ორ ლოკაციაზე ტარდება აქცია, თავდაპირველად, მისი მონაწილეები მერიასთან მიდიან, რათა იქ მომუშავე საჯარო მოხელეებს მიაწვდინონ ხმა, შემდეგ კი, ის სახელმწიფო რწმუნებულის ადმინისტრაციასთან მიდიან.

შეკრებილებს მიმართავენ, გამომსვლელები. ადგილზე დამონტაჟებულია მონიტორი, რომელზეც ქვეყანაში მიმდინარე აქციების ტრანსლირება მიმდინარეობს.

ცნობისთვის, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, საპროტესტო აქციები იმართება.

ამავე თემაზე:

ყოველდღე ქვეყნის სამსახურში - ზუგდიდში აქცია მიმდინარეობს (ფოტო)

ვაპროტესტებთ საქართველოს რუსეთიზაციას, - ზუგდიდში აქციის მონაწილეებმა მსვლელობა გამართეს (ფოტო)