სოხუმში ნაძვის ხის ანთების ცერემონია 25 დეკემბრისთვის გადაიდო. მიზეზად, 19 დეკემბერს „პარლამენტში“ მომხდარი სროლა სახელდება, რის შედეგადაც, „დეპუტატი“ ვახტანგ გოლანძია დაიღუპა, ხოლო „დეპუტატი“ კან კვარჩია დაიჭრა. სროლაში ეჭვმიტანილს, აფხაზური მედიის მიხედვით, ამ დრომდე ეძებენ.

„აფსადგილ ინფოს“ თანახმად, 20 დეკებერს დაგეგმილი ღონისძიების გადადების შესახებ, სოხუმის ე.წ. ადმინისტრაციაში გამართულ შეხვედრაზე გახდა ცნობილი. აქვე აღნიშნულია, რომ საახალწლო ღონისძიებები 24 დეკემბრიდან 4 იანვრის ჩათვლით გაიმართება.

ნოემბრის დასაწყისში მოსკოვმა სოხუმს ჰუმანიტარული ელექტროენერგიის მიწოდება შეუწყვიტა. 11 დეკემბრიდან მოსახლეობას დღისით 2 საათით და 40 წუთით მიეწოდებოდა დენი, ღამით კი 21:00 საათიდან 07:00 საათამდე. 23 დეკემბერს გავრცელდა ინფორმაცია, რომ რუსეთმა ოკუპირებული აფხაზეთისთვის ელექტროენერგიის ჰუმანიტარული ნაკადის მიწოდება დაიწყო. კომპანია "ჩერნომორენერგო" იუწყებოდა, რომ დენი დღე - ღამეში, მხოლოდ 4 საათით გაითიშება. 

უკვე წლებია, სოხუმი ენერგოდეფიციტის აღმოფხვრას ვერ ახერხებს. ადგილობრივი ენერგოკომპანია ამის მიზეზად ელექტროქსელებზე გაზრდილ დატვირთვას და ინფრასტრუქტურის ცვეთას, სრული გამრიცხველიანების არარსებობას, ელექტროენერგიაზე დაბალ ტარიფებს, მოსახლეობის ნაწილის მიერ ელექტროენერგიის საფასურის გადაუხდელობას და კრიპტოვალუტის უკანონო მაინინგს ასახელებს.

ინფორმაციისთვის, ზამთრის თვეებში ენგურჰესი, ძირითადად, აფხაზური მხარის საჭიროებებს აკმაყოფილებდა. მხარეებს შორის არსებული შეთანხმება გამომუშავებული რესურსის 60/40-ზე პარიტეტით გადანაწილებას გულისხმობს.

ცნობისთვის, აფხაზი ლიდერის ასლან ბჟანიას გადადგომის და ე.წ. პარლამენტის მიერ მოსკოვთან „საინვესტიციო ხელშეკრულების“ ჩაგდების შემდეგ, მოსკოვმა სრულად შეუჩერა სოხუმს დაფინანსება.