2 მარტიდან აფხაზეთიდან რუსეთში მიმოზის მიწოდება განახლდა. “აფსნიპრესის“ თანახმად, „როსსელხოზნადზორმა“ გამოაცხადა რუსეთში ამ საკარანტინო პროდუქტის იმპორტზე შეზღუდვების მოხსნის შესახებ, „აფხაზეთის მცენარეთა სახელმწიფო საკარანტინო ინსპექციის გარანტიით“.

აფხაზური “საექსპორტო“ მიმოზის რუსეთში შეტანა 22 თებერვალს აიკრძალა. 

რუსეთის საკარანტინო სამსახურმა მაშინ განაცხადა, რომ მიმოზაში კალიფორნიული ყვავილოვანი თრიპსი აღმოაჩინეს. 

ტელეგრამის არხები წერდნენ, რომ ფსოუს ე.წ. საზღვარზე მიმოზით დატვირთული ათობით, მათ შორის, სატვირთო მანქანა დგას, რომელიც რუსეთში საქონლის გატანის ნებართვას ელოდება.

სოციალური ქსელის მომხმარებლები წერდნენ, რომ მიმოზის „ექსპორტი“ არჩევნების გამო აიკრძალა, რათა „პრეზიდენტობის“ ერთ - ერთ კანდიდატს, ამომრჩევლების ხმები არ დაეკარგა.

ამავე ცნობით, სხვადასხვა შეფასებით, მიმოზის ყვავილების გასაყიდად 8 ათასზე მეტი მოქალაქე გეგმავდა ოკუპირებული აფხაზეთის „საზღვრებს“ გარეთ გამგზავრებას.

ასევე, აღინიშნა, რომ  2024 წლის  დეკემბერში, "საპრეზიდენტო" არჩევნების პირველ ტურამდე, რუსეთის საკარანტინო სამსახურმა აფხაზეთიდან რუსეთში „ექსპორტირებული“ ციტრუსის ერთ-ერთ პარტიაში ასევე აღმოაჩინა კალიფორნიული თრიფსი.

ოკუპირებულ აფხაზეთში "საპრეზიდენტო" არჩევნების მეორე ტურში, რომელიც 1 მარტს ჩატარდა, ბადრა გუნბამ გაიმარჯვა. მან ხმების 54,73% დააგროვა, ხოლო მეორე კანდიდატმა, ადგურ არძინბამ - 41,54%.