აფხაზეთის დე ფაქტო რესპუბლიკის ე.წ. შინაგან საქმეთა სამინისტროს განცხადებით, 1 მარტს გაგრის რაიონში „საარჩევნო უბანზე“ მომხდარ შეიარაღებულ თავდასხმასთან დაკავშირებით, 10 ადამიანია დაკავებული.

ამავე ცნობით, დაკავებულებს შორის არიან ოპოზიციონერი და „საპრეზიდენტო კანდიდატის“ ადგურ არძინბას ახლობლები.

ხუთშაბათს ღამით შვიდი ადამიანი დააკავეს: ადამურ ფაჩალია, ბატალ ფაჩალია, ტიმურ ფაჩალია, ალხას მიკანბა, ანრი ხაგბა, ახრა ფაჩალია და საიდ არძინბა.

„ასევე ამოღებულია დამნაშავეების კუთვნილი დიდი რაოდენობით იარაღი: ავტომატები, პისტოლეტები, ხელყუმბარები და მათთვის განკუთვნილი საბრძოლო მასალა“, - იუწყება მედია კლუბი Апсны.Иахьа დე ფაქტო შსს- ზე დაყრდნობით.
მანამდე, ამ საქმეზე რაფაელ გუაზაა, იგორ ორჩუკბა და ნურიკ სმირი დააკავეს.

მანამდე, Telegram-ის არხმა RESPUBLICA-მ გამოაქვეყნა ვიდეო კადრები და ინფორმაცია, რომელშიც ვკითხულობთ, რომ „პოლიციელებმა, ე.წ. შინაგან საქმეთა მინისტრის, რობერტ კიუტის ბრძანებით, ესროლეს მიმავალ ავტომობილს.
თავის მხრივ, კიუტმა განაცხადა, რომ „თანამშრომლები პოლიციის შესახებ კანონის შესაბამისად მოქმედებდნენ, რომელიც სიცოცხლისთვის საფრთხის შემთხვევაში მოქმედებას მკაფიოდ არეგულირებს“ და „დამნაშავეები არჩევნების ჩაშლას და ქვეყანაში სიტუაციის დესტაბილიზაციას ცდილობდნენ“.

1 მარტს, აფხაზეთის თვითგამოცხადებულ რესპუბლიკაში „საპრეზიდენტო“ არჩევნების მეორე ტური გაიმართა.

საღამოს გავრცელდა ინფორმაცია გაგრის რაიონში პოლიციის განყოფილებაზე შეიარაღებული თავდასხმის, ასევე მიუსერას საგუშაგოზე ორმხრივი სროლის შესახებ. აფხაზეთის თვითგამოცხადებული რესპუბლიკის შინაგან საქმეთა სამინისტროს ინფორმაციით, თავდამსხმელებმა გაქცევა მანქანებით სცადეს. დევნის დროს შსს-ს თანამშრომლებმა მიუსერას საგუშაგო გადაკეტეს. შეჩერების მოთხოვნების დაუმორჩილებლობის გამო, თავდამსხმელებმა ცეცხლი გახსნეს.ამავე ცნობით, ორი დაჭრილი გუდაუთის საავადმყოფოში გადაიყვანეს.

რუსეთის საგამოძიებო კომიტეტმა 1 მარტს, აფხაზეთში მომხდარ სროლასთან დაკავშირებით, „ტერორიზმის“ მუხლით საქმე აღძრა. 

გუშინ, ტელეკომპანია Россия-მ გაავრცელა ინფორმაცია იმის თაობაზე, რომ ოპოზიციის ლიდერის ადგურ არძინბას გარემოცვის რამდენიმე წარმომადგენელი ჩვენების მისაცემად რუსეთში გაემგზავრა.

„საგამოძიებო კომიტეტში შეახსენებენ, რომ ოპოზიციონერის მხარდამჭერებს სისხლისსამართლებრივი დევნისგან თავის არიდება შეუძლიათ - ეს შეეხება მათ, ვინც ტერაქტის აღკვეთას, ორგანიზატორების და დამფინანსებლების გამოვლენას შეუწყო ხელი“, - ნათქვამია რუსული ტელეარხის სიუჟეტში.

ოკუპირებული აფხაზეთის „საპრეზიდენტო“ არჩევნების მეორე ტურის შედეგების მიხედვით, „საპრეზიდენტო“ არჩევნებში ბადრა გუნბამ გაიმარჯვა.

5 მარტს, გუნბა რუსეთის პრეზიდენტმა, ვლადიმირ პუტინმა კრემლში მიიღო და მხარდაჭერას დაჰპირდა. 

ვადამდელი „საპრეზიდეტო“ არჩევნები ოკუპირებულ აფხაზეთში მას შემდეგ დაინიშნა, რაც ყოფილი “პრეზიდენტი” ასლან ბჟანია თანამდებობიდან 2024 წლის 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა.