აფხაზეთის დე ფაქტო რესპუბლიკის ე.წ. პრეზიდენტი ბადრა გუნბა 9 მაისს, მოსკოვში დაგეგმილ გამარჯვების აღლუმს დაესწრება. ამის შესახებ „რუსეთში ფხაზეთის ელჩმა“ ალხას კვიცინიამ "რია ნოვოსტის" განუცხადა.

"აფხაზეთის პრეზიდენტმა პუტინისგან 9 მაისს დაგეგმილ აღლუმზე მოწვევა მიიღო და სადღესასწაულო ღონისძიებებში მონაწილეობის მისაღებად აუცილებლად ეწვევა მოსკოვს", - განაცხადა კვიცინიამ.

რუსული RBC - ს თანახმად, ღონისძიებებში მონაწილეობას ასევე ადასტურებენ: ილჰამ ალიევი – აზერბაიჯანი; ნიკოლ ფაშინიანი – სომხეთი, ალექსანდრ ლუკაშენკო – ბელარუსი, ლუის ინასიუ ლულა და სილვა – ბრაზილია; იბრაჰიმ ტრაორე – ბურკინა ფასო, ნიკოლას მადურო – ვენესუელა, ტო ლამი – ვიეტნამი; კასიმ-ჟომარტ ტოკაევი – ყაზახეთი; სადირ ჟაპაროვი – ყირგიზეთი; სი ძინპინი – ჩინეთი; მიგელ დიას-კანელი -კუბა; მაჰმუდ აბასი – პალესტინა; მილორად დოდიკი – სერბთა რესპუბლიკა, ალექსანდრ ვუჩიჩი – სერბეთი; რობერტ ფიცო – სლოვაკეთი; ემომალი რაჰმონი – ტაჯიკეთი; გურბანგული ბერდიმუხამედოვი – თურქმენეთი; შავკატ მირზიოევი – უზბეკეთი.

ამავე ცნობით, მოწვევები ასევე გაეგზავნა ინდოეთის პრემიერ-მინისტრს, ნარენდრა მოდის და მონღოლეთის პრეზიდენტს, უხნაგიინ ხურელსუხს, თუმცა მათ ჯერ არ დაუდასტურებიათ, ჩავლენ თუ არა მოსკოვში.
გაერო-ს გენერალური მდივანი ანტონიო გუტერეში ღონისძიებას არ დაესწრება.

რუსეთის პრეზიდენტის პრესმდივანმა დიმიტრი პესკოვმა განაცხადა, რომ აშშ-ის პრეზიდენტის, დონალდ ტრამპის გამარჯვების აღლუმზე ვიზიტის შესახებ საუბარი არ არის.

ვროკავშირის ხელმძღვანელობა ევროპული ქვეყნების ლიდერების მონაწილეობას მოსკოვში გამართულ აღლუმში მონაწილეობას ნეგატიურად უყურებს და მოუწოდებს მათ არ დაესწრონ აღლუმს და სოლიდარობის ნიშნად, უკრაინის გვერდით დადგნენ.

რუსეთის პრეზიდენტმა ვლადიმირ პუტინმა ოკუპირებული აფხაზეთის ე.წ. პრეზიდენტი ბადრა გუნბა 9 მაისს, ფაშიზმზე გამარჯვების 80 წლისთავის აღსანიშნავ ღონისძიებაზე, 2 აპრილს, გუნბას „ინაუგურაციის“ დღეს მიიწვია.
პუტინის თანახმად, „გამარჯვების დღეს განსაკუთრებული მნიშვნელობა აქვს რუსეთისა და აფხაზეთის ძმური ხალხებისთვის“.

"საპრეზიდენტო" არჩევნების მეორე ტური ოკუპირებულ აფხაზეთში 1 მარტს გაიმართა და მასში კრემლის ფავორიტმა, ბადრა გუნბამ გაიმარჯვა. მისი მეტოქე იყო, ოპოზიციონერი -  ადგურ არძინბა.

2 მარტს რუსეთის პრეზიდენტმა, ვლადიმერ პუტინმა გუნბას გამარჯვება მიულოცა.

5 მარტს პუტინმა გუნბა კრემლში მიიღო, ამასთან, აფხაზებისთვის ორმაგი მოქალაქეობის და სხვა საკითხების მოგვარებას დაჰპირდა.

ვადამდელი „საპრეზიდეტო“ არჩევნები ოკუპირებულ აფხაზეთში მას შემდეგ დაინიშნა, რაც ყოფილი “პრეზიდენტი” ასლან ბჟანია თანამდებობიდან 2024 წლის 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. პასუხად, მაშინ მოსკოვმა სოხუმს სრულად შეუჩერა დაფინანსება.