აფხაზეთისა თვითგამოცხადებული რესპუბლიკის ახლად არჩეული ე.წ. პრეზიდენტი ბადრა გუნბა მოსკოვში 9 მაისს, ფაშიზმზე გამარჯვების 80 წლისთავისადმი მიძღვნილ ღონისძიებებს დაესწრო.
„აფსნიპრესის“ თანახმად, ბადრა გუნბა მეუღლესთან, ირმა ხაშიგთან ერთად მოსკოვს სტუმრობს.

„აფხაზეთის პრეზიდენტსა და რუსეთის პრეზიდენტ ვლადიმერ პუტინს შორის ორმხრივი შეხვედრა 10 მაისს არის დაგეგმილი, რომელზეც აფხაზეთ-რუსეთის თანამშრომლობის ფართო სპექტრის საკითხები იქნება განხილული“, - განუცხადა „აფსნიპრესს“ აფხაზეთის პრეზიდენტის პრესსამსახურის ხელმძღვანელმა, ალხას ჩოლოკუამ.

პუტინი და გუნბა უკვე შეხვდნენ კრემლში მარტში, აფხაზეთში საპრეზიდენტო არჩევნების მეორე ტურის შემდეგ მალევე, რომელშიც გუნბამ გაიმარჯვა.

2 აპრილს, გუნბას „ინაუგურაციის“ დღეს, ცნობილი გახდა, რომ გუნბა 9 მაისს, მოსკოვში დაგეგმილ გამარჯვების აღლუმს დაესწრება. ამის შესახებ „რუსეთში ფხაზეთის ელჩმა“ ალხას კვიცინიამ განაცხადა.

"აფხაზეთის პრეზიდენტმა პუტინისგან 9 მაისს დაგეგმილ აღლუმზე მოწვევა მიიღო და სადღესასწაულო ღონისძიებებში მონაწილეობის მისაღებად აუცილებლად ეწვევა მოსკოვს", -თქვა მან.

ვადამდელი „საპრეზიდეტო“ არჩევნები ოკუპირებულ აფხაზეთში მას შემდეგ დაინიშნა, რაც ყოფილი “პრეზიდენტი” ასლან ბჟანია თანამდებობიდან 2024 წლის 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. პასუხად, მაშინ მოსკოვმა სოხუმს სრულად შეუჩერა დაფინანსება.