მარტვილის სკოლებში დასაქმებული მიკროავტობუსების მძღოლების ნაწილი ხელფასების დაგვიანების გამო გაიფიცა. პროტესტის ერთ-ერთი მონაწილე რადიო "ათინათს" უყვება, რომ დასაქმებულების ნაწილს იანვრის და თებერვლის თვის ხელფასები აღებული არ აქვს. ჩვენი რესპონდენტი გვეუბნება, რომ მძღოლების დიდი ნაწილი პროტესტში სოლიდარობის ნიშნად ჩაერთო.

"იანვრის და თებერვლის თანხა არ აქვს ზოგს ჩარიცხული და მარტის თანხას ყველა ველოდებით. ზოგს 4 თვის ფული აქვს ასაღები. არავინ არ გვეუბნება, როდის ჩაგვირიცხავენ ფულს. დაგვპირდნენ, მაგრამ ზუსტს ვერაფერს გვეუბნებიან. ჩვენ სხვა მძღოლებს ვუცხადებთ სოლიდარობას და ამიტომ ვდგავართ აქ", - უთხრა რადიო "ათინათს" ერთ-ერთმა გაფიცულმა.

მუნიციპალიტეტის მერი ამტკიცებს, რომ ადგილობრივი ბიუჯეტიდან კონტრაქტორმა ინდმეწარმე ზაზა ახალაიამ თანხა სრულად მიიღო. საუბარია იანვარ-თებერვლის ხელფასებზე. მერის თქმით, ზაზა ახალაიამ, რომელიც თავის მხრივ, მძღოლებთან არის ანგარიშვალდებული, ნაკისრი მოვალეობა პირნათლად არ შეასრულა და დასაქმებულებს ხელფასები დაუგვიანა, რაც პროტესტის მიზეზი გახდა.

"კონტრაქტორი კომპანია ხარვეზით ურიცხავს თანხას მძღოლებს, მერიას დავალიანება მათთან მიმართებაში არ აქვს, ჩვენ რა ინფორმაციასაც ვფლობთ, ინდმეწარმეს აქვს დავალიანება. ჩვენ კომპანიას გადავურიცხეთ თანხა, თუმცა პირნათლად არ ასრულებს ნაკისრ ვალდებულებას. მე კონტრაქტორსაც ველაპარაკე და მითხრეს, რომ მხოლოდ რამდენიმე ადამიანის დავალიანება აქვთ, მძღოლები კი პირიქით ამბობენ, სამწუხაროდ, ჯერ შედეგს ვერ მივაღწიეთ", - უთხრა რადიო "ათინათს" მარტვილის მერმა თორნიკე ჯანაშიამ.

ჩვენ კონტრაქტორ კომპანიასაც დავუკავშირდით და ზაზა ახალაიას წარმომადგენელს, იასონ შეროზიას ვესაუბრეთ. მისი თქმით, პრობლემა მას შემდეგ გაჩნდა, რაც მარტვილის მუნიციპალიტეტმა იანვარ-თებერვლის თანხა დანაკლისით ჩარიცხა. შეროზიას თქმით, კონტრაქტორმა მერიისგან 13 800 ლარით ნაკლები მიიღო. თავის მხრივ, მუნიციპალიტეტი ბრალდებას უარყოფს და საპირისპიროს ამტკიცებს.

"პრობლემა საიდან დაიწყო, მაგას გეტყვით. იანვრის თვის მომსახურების თანხა უნდა ჩაერიცხა მერიას 94 000 ლარი და ჩამირიცხეს 13 800 ლარით ნაკლები. მერიისგან დამაკლდა თანხა და აქედან დაიწყო პრობლემები. მე ჩემი პირადი მოზიდული თანხებით შევავსე ეს დანაკლისი ანუ ის თანხა, რომელიც მე მერიამ არ მომცა. მერია როცა ჩამირიცხავს თანხას, იქიდან 10 სამუშაო დღეში უნდა გავცე თანხა. პროტესტი ვისაც უნდა ჰქონდეს, პირველ რიგში მე ვარ. მე წერილობით მათი მხრიდან არ მიმიღია გაფრთხილება, რომ სამუშაოდ არ მიდიან, როგორც ამას ხელშეკრულება ითხოვს. 86 მძღოლია სულ დასაქმებული, დაახლოებით 70 ადამიანი მუშაობს, ხელფასის დავალიანება გვაქვს სულ 6 თუ 7 მძღოლთან. საერთოდ პროტესტში ჩართულია 15-20 დასაქმებული, მათ პროტესტის სამართლებრივი უფლება არ აქვთ", - უთხრა რადიო "ათინათს" იასონ შეროზიამ.

ზაზა ახალაიას წარმომადგენლის თქმით, მას შემდეგ, რაც მერიისგან მარტის ხელფასების თანხას მიიღებს, საკუთარი მოგების ნაწილიდან მოახდენს გაფიცული მძღოლებისთვის ასანაზღაურებელი ხელფასის გადახდას.

კონტრაქტორი კომპანიის წარმომადგენელი გვიყვება, რომ მერიის მხრიდან დაგვიანებულ თანხასთან დაკავშირებით ინდმეწარმე დავების საბჭოში განცხადებას შეიტანს.

ამ ეტაპზე პროტესტში მძღოლების ნაწილია ჩართული, უმეტესობა კი მუშაობას აგრძელებს.