პერსონალურ მონაცემთა დაცვის სამსახური მოსახლეობას მოუწოდებს, გამოიჩინოს განსაკუთრებული ყურადღება და სიფრთხილე უცხო ნომრებიდან შემოსულ ზარებსა და მოკლე ტექსტურ შეტყობინებებზე. ამის შესახებ განცხადება უწყებამ ვებ გვერდზე გაავრცელა.

შემომავალი ზარების უსაფრთხოებასთან და პერსონალური მონაცემების დაცვასთან დაკავშირებით, ისინი შემდეგ რეკომენდაციებს აქვეყნებენ:

ზარები:

დააკვირდით შემომავალ ზარს და იმ შემთხვევაში, თუ აღნიშნული ხორციელდება არასტანდარტული ინდექსის ან სტანდარტულისგან განსხვავებული ციფრთა კომბინაციით, არ უპასუხოთ მას და დაბლოკეთ ნომერი;

თუ დაგხვდათ გამოტოვებული ზარი და ის შეიცავს მსგავს (არასტანდარტულ) მახასიათებლებს, არ დაუკავშირდეთ მას;

თუ არ გაქვთ კომუნიკაცია სხვა ქვეყანაში მყოფ პირთან, არ უპასუხოთ საქართველოს შიდა ინდექსისგან (+995) განსხვავებულ ნომერს;

იმ შემთხვევაში თუ გადაწყვეტთ უპასუხოთ ზარს, არ გაუზიაროთ თქვენთან, ოჯახის წევრებთან ან ნაცნობებთან დაკავშირებული ნებისმიერი პერსონალური ინფორმაცია.

შეტყობინებები:

დაკვირვებით გაეცანით შეტყობინების შინაარსს, რომელიც შესაძლოა მიიღოთ, როგორც მოკლე ტექსტური სახით (SMS), აგრეთვე სხვადასხვა აპლიკაციით (Messenger, WhatsApp, Viber, Telegram, Signal). . როგორც წესი, მსგავსი ტიპის შეტყობინებები გრამატიკულად გაუმართავია, რაც მათ იდენტიფიცირებას ამარტივებს;

არ დაამყაროთ მათთან უკუკავშირი, არც ზარის და არც საპასუხო ტექსტის მეშვეობით;

არ გადახვიდეთ შეტყობინებებზე მითითებულ ბმულებზე. გაითვალისწინეთ, რომ მათი ნაწილი შეიძლება არსებული ვებ-გვერდების მისამართის მიმსგავსებულ ანალოგიას, ხოლო ნაწილი ასოთა ან სიტყვათა უშინაარსო წყობას წარმოადგენდეს.

განსაკუთრებული სიფრთხილე გამოიჩინეთ ისეთი შინაარსის შეტყობინებებთან მიმართებით, რომელიც დაკავშირებულია რაიმე სახის გათამაშებასთან, კონკურსთან და საფოსტო გზავნილის მიღებასთან;

ტელეფონებსა და კომპიუტერებში არსებულ აპლიკაციებსა და ანგარიშებზე დააყენეთ ძლიერი პაროლი, ისარგებლეთ ორფაქტორიანი ავთენტიფიკაციის მეთოდით (2FA) და სისტემატურად განაახლეთ იგი.

უწყება ურჩევს საზოგადოებას, აღნიშნული ინფორმაცია, მათი პერსონალური მონაცემების უსაფრთხოების შენარჩუნების მიზნით, გაუზიარონ ოჯახის წევრებსაც.