"სოციალური სამართლიანობის ცენტრი" ეხმაურება აფხაზეთიდან დევნილი ემიგრანტების არჩევნებში მონაწილეობის უფლების საკითხს.

ორგანიზაცია მოუწოდებს ცენტრალურ საარჩევნო კომისიას, ასევე ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს, დაუყოვნებლივ მიიღონ სპეციალური ზომები საქართველოს მოქალაქეების ამ ჯგუფის საარჩევნო უფლების უზრუნველსაყოფად.

მათი განმარტებით, დევნილთა სამინისტრო ემიგრანტების ამ ნაწილს სთავაზობს, რომ მათ შეუძლიათ უარი თქვან ოკუპირებულ აფხაზეთში მათ იურიდიულ მისამართზე და დარეგისტრირდნენ საქართველოს კონტროლირებად ტერიტორიაზე.

"აღნიშნული პრაქტიკა ეწინააღმდეგება დევნილთა უფლებების და საუკეთესო ინტერესების დაცვის მიზანს, რიყავს მათ საზოგადოებრივი და პოლიტიკური პროცესებისგან და ისედაც მოწყვლად მდგომარეობაში მყოფ საქართველოს მოქალაქეებს, კიდევ უფრო აშორებს საქართველოს სახელმწიფოსგან. კრიტიკულია, რომ საქართველოს ხელისუფლებამ დევნილი მოსახლეობა არ უნდა დააყენოს დაბრუნების უფლების ან ხმის მიცემის უფლების არჩევანის წინაშე", - ვკითხულობთ მათ ვებ გვერდზე.

ორგანიზაცია საჭიროდ თვლის, ხელისუფლებამ შეიმუშაოს სამართლებრივი მექანიზმები, რაც არ გამოიწვევს დევნილების სტატუსის დაკარგვის შემთხვევაში მათი ფაქტობრივი საცხოვრებელი ადგილის მისამართის გაუქმებას და ისინი იქნებიან ამომრჩეველთა ერთიან სიაში.

ცნობისთვის, საზღვარგარეთ მცხოვრები დევნილების ნაწილი ამბობს, რომ ამომრჩეველთა ერთიან საარჩევნო სიაში ვერ მოხვდა. მათი განმარტებით, ისინი რეგისტრირებული არიან საქართველოს საკონსულოებში, აქვთ ქართული პირადობის დამადასტურებელი დოკუმენტები, თუმცა, იმ მიზეზით, რომ საქართველოს კონტროლირებად ტერიტორიაზე ფაქტობრივი მისამართი არ აქვთ და მათი რეგისტრაციის ადგილი აფხაზეთია, არჩევნებში ხმის მიცემის უფლება ეზღუდებათ.

საქართველოს სახალხო დამცველი კი ცესკოს მოუწოდებს აფხაზეთიდან დევნილ ემიგრანტებს არჩევნებში მონაწილეობის შესაძლებლობა მისცეს.